Thaydwan 2

Ginkihbw 2-8

PAAPC KHOU KEKYLOUMEI

Sabbath Tingzinv

Ginkihbw 2

Mi kanit dak khang kathay o: Gen. 3; 2 Cor. 11:3; Rev. 12:7-9; John 8:44; Rom. 16:20; Heb. 2:14; 1 Timo. 2:14, 15.

Ningtow nimei latlangv: “Ai rui ntumei pui lev nangnei kak khou khatni nangkik taa lev kakik taa kak khou ti howthou lou puni. Kamei rui nangpi swpiak puni khatni nang rui kakiktaa phaychwm nchow puni” (Gen. 3:15).

Eden khou aniu tuang reymei poupeih nei khou Ravguangc rui kakhim (warning) lou khwan e, “pikuan khou naimei thingbang guay tingthai nang twnuh e; tiky simei gaymei thaymei thingbang thai tei thu tulak nina e; mi tei tu e thei turap nungc rui nang theic puni” (Gen. 2:16, 17). Simei lev gaymei thaymei ningting tingthai tu mak khang kakhim loumei hei rui dinhmei thu Ravguangc rui kanei ta gaymei na ti thayna simei thu tithai nimakge twmei e. Aniu mi hei nthanna thay e.

Theihmei hei latpiu mak khou rui pat tuang e (Gen. 2:17). Kanei theic changh puni the (Gen. 3:19). Mi tingthai tei tu e thei theihmei na hamna Eden pikuan khou tei rui kathao pat puni the (Gen. 3:24). Kumpuizaeng rui paapc taanhmei rui ringhmei tingthai tei tu lana tingsaengzaeng ringc bam khang Ravguangc rui nuh lou mak khwan the.

Kum khwan sini reymei gaychamv tei kanei khang tilou khwan e (Gen. 3:15). Maansei rui paapc khou keylou khwan sini laduak pat loudat nimei chaeng tei Ravguangc rui sw lou khwan e.

Neihneic

Ginkihbw 3

NRUY TEI

Gen. 3:1, 2 Cor. 11:3, khatni Rev. 12:7-9 hei pac o. Nruy hei thoucho, khatni kamei rui akumhna Eve ta guat kan tucho?

Mi baibal bamv khou nruy ta sathao rey e. Mi hei rui kata tancna sa tuang e. English baibal ram hi khou “nruy tei” twna hy e. Mi kaba thu mi nruy ti hei kahu nungc rui thayrey bammei ta tei sadat pui latre.

Nrui hei Ravguangc ta howmu mei e (Isai. 27:1) kata rasic khatni Seitaan twna kau e (Rev. 12:9). Reynungc mei nunc rui nrui ta simei ngamv ta thaynah e.

“Seitaan rui katuang mei guatmei taanv nkamhna taanh khang nrui guanh khwan e. Nrui hei ningtingliangmei, kalun howgaymei khouringc e. Kariu kachaekc riw kumc gaanc kangranna kasukaeng naina tingpuk khou samc ngam khwan e” (pp, p, 53).

Tabui bui lwn gwanlih bam sini Seitaan hei kapumc naimei, simei riak phungc pat thaymei maansei ta simei tiguanh ngammei akhat re twmei baibal rui dinc lou e (Matt. 4:6).

Nrui tei rui ntumei pui tateic lat agih thao nuangh makge, tiky Ravguangc rui kadih loumei lat tei kamei thay kumcna lat thanv e, “pikuan khou tabui bang thai puni tulak nina e twna Ravguangc rui salou changh bo? Kalat ramsa tei kanei adih karouc simei ningting nai tucho twmei zaoc o.

Eden khou paapc makmei Eve ta sini Seitaan rui guat ngam e thei nang anei suanmei tathu adi chiwna nthiam ngam puni bo? Tabui tuang rui kata dingthing ngam puni bo?

Gaanhneic

Ginkihbw 4

TUTIU TWNA SALOUMEI TINGTHAI

Gen. 2:16, 17 khatni Gen. 3:1-6 (John 8:44 heini pac o). Adam khou tiloumei latdanv lev nrui rui Eve khou nthiammei lat tei kida o. Milat kanei hei tabui baicnoumei naibo, khatni mituang baicnoumei kabac tabui cho?

Ravguangc rui Adam khou samei lev (Gen. 2:16, 17) Eve rui nrui lev pary rahmei tei thay o. Nrui tei rui Ravguangc lat tei sa kadatna Ravguangc suangc kamei thay mbu kumc sa e. Ravguangc lat tei Eve rui la kadat tikumcna nrui tei rui sa khwan e. Kaling thu Seitaan tei rui Ravguangc lat sa kadat tuang e.

Seitaan ram nthiam khou kalam kanei nai e, theihmei khatni simei lev gaymei thaymei ningting hei e. Ravguangc rui theic puni twna sa tiki Seitaan rui theic nitu ham e, twmei thu maansei hei theiczath makge twna sa tuang e (Gen. 3:4). Eve rui tingthai tei tu e thei Ravguangc kumc puni the twna Seitaan rui nthiam khwan e (Gen. 3:5).

Seitaan tuang agi khiammei latbamv kanei: theic dat makmei khatni Ravguangc luihmei hei the. Mi tei ruina Eve ta tingthai tei titu tuang e. Eve rui Ravguangc lat ta twanlyam na tingthai tei tuni the twna kalung ding rap pukhou Ravguangc bam mak kumc ning the kumna Ravguangc phaan kamei lyn khwan the. Ravguangc rui kamei damc pat loumei guay tei zaoc pukhou “howgay the’ twna saa kan kumc Eve ni turiu twmei tingthai tei how pukhou “howgay e” twna sa muay khwan e (Gen. 1:4).

Theic zath makmei lev Ravguangc luihmei, mi kanei hei reynung Egypt lev Greekmei nunc raning khou rui kabangbi swna guang tuang e. Theic zath mak khang kahau mei twmei chwn naimei hei Ravguangc tuang kagunc kaga the. Kumpuizaeng rui maansei rui theic zath mak khang phumei hei Ravguangc lev nchamc khang phu tuang the. Mi kumhmei ram lwm hei Jihudi lev khristian nunc chapriak khou sihnic thaymak daekna tiapgut na ti lwm bam tuang e, kumtina aseic khristian phwamling peina rui maansei hei theic ti sihni theih makge, tingkauh thangc ku bam the, ham e thei maikuam khou bam the twna lwm bam geihmei hei e.

Maansei kathuih khou theizath makmei bumaengc akhat nai e twna lwm bammei tihei makumh zaoc o. Mi kumhmei kabiu nuhmei nkhuaimei ram lum ta gaekduak khang, maansei tuang kalunlungc lwn khatni theihmei lwnlung ta kabah thaymei rui akumhna ding akhang khang sw lou  bo?

Dihneic

Ginkihbw 5

RAVGUANGC HU KHOU NKAMHMEI

Gen. 3:7-13, Adam lev Eve kanei Ravguangc khou rui nkamh khang kage nai the twna akumhna ning tuang cho? “Nang tabui khou bam tucho” twna Ravguangc rui tabuizaeng sa tuang cho? Adam lev Eve kanei rui nzih khang akumhna dau bo?

Paapc khou keylou rap pukhou Ravguangc lwn ndauh bammei hymdaihmei pwan tei amaan kan khwan the (Ps. 8:5 kida o Ps. 104:1, 2). Ravguangc lwn tei paapc rui sw kasic lou the. Kanei rana pheybaan khang kasiamh thao khwan the (Gen. 3:7). Kasiamh mei twmei hei Ravguangc na rui ngam tuang e (Gen. 1:7, 16, 25). Kanei paapc ta kagum liam khang taanv taanc thao pukhou Ravguangc phaan lyn thao khwan the. Mi tihei Paul rui taanv paan rui rachap tat khang phumei twna sa lou e (Gala. 2:16).

“Nang tabui khou bam to” twna Ravguangc rui thanv khwan the (Gen. 3:9). Mi latthanv kahak hei Cain khou ni thanv khwan e. Ravguangc rui kabam thay lamakna thanv tu ham e tiky nkhuaimei pu tei kamei tabui taanc nkhuai lou thicho twmei thaylana lunglaic na ringhmei ladat kan khang than tuang e. Maansei hei paapc khou key lou rap nungc rui maansei ta Ravguangc rui thuak lou dat khang phu bam tuang e.

Mi hei kheiliak kathaimei latzan thiakge (Investigative judgement). Latzan pouc rui nkhuaimei pukhou tei lat thanv e (Gen. 3:9). Mi tei khuai-zih latzan kaocpat khang e (Gen. 3:14-19). Kum e tiky mi tei nkhuaimei pu ta ti lunghlaih khang khatni ringhbamv latow dat kan khang e. Mithiak hei baibal bamv guay khou nai ngam e.

Paapcmei guay kheiliak kumc muayna Adam lev Eve kanei tei khuay duak nuh khang meic baihmei ta khuay kham e. Adam rui kanou ta khuay kham the (Gen. 3:12). Eve rui Adam ta thiam changh khwan e. Kumthina Ravguangc ta ni khuay kham tuang e.

Eve rui nrui ta khuay kham the. Hebrew latkaeng nashi twmei hei “guatmei” tw tuang e (Gen. 3:13). Nkhuaimei ta nchumh kumc tining louna nkhuaimei taanv titaanc loumei ta e (2 kings 19:10, Isai 37:10, Jere 49:16).

Kamei rui taanc khuai loumei taanv ta mei rammei khang kham loumei: Mi kumhmei taanv hei aniu taanh khang chiw bammei hei tabui sw tucho?

Tingsanneic

Ginkihbw 6

NRUI TUANG SAN

“Ai rui ntumei pui lev nangnei kak khou khatni nangkik taa lev kakik taa kak khou ti howhou lou puni. KaMei rui nangpi swpiak puni khatni nang rui kakiktaa ta kaphaichwm nchow puni” (Gen. 3:15). Mi lat hei Ravguangc rui nrui khou tabui sa pui lat cho, khatni mi lat khou lwmgaymei tabui naibo?

Ravguangc rui katuang latzan nrui khou rui kahou bammei hei kamei rui paapc tipat lou khou rui e. Ravguangc rui kasiang lou kanmei hei kata nade.

Khou hei “damhmei ta kadat kadaengmei” nai the Damhmei rui suaihiam, ringhmei khatni gaymei nai the. Latzan rui simei, syang khatni theihmei tipat lou the. Kum e tiky mi latzan khou tei ringhbamv tuang latryan khatni lwmgaymei ni nai e. Kasiang loumei nrui tei taniang tu puni the (Gen. 3:14). Kumna ringhbamv tuang machun tei dinc kasuakc lou the. Adam lev Eve tei paapc khou key lou the. Kanei paap taanvphy phang puni the. Kum e tiky thuaklou dat nimei lwmgaymei tei Ravguangc rui tilou khwan e (Gen. 3:15).

Gen. 3:15 lev Rom. 16:20; Heb. 2:14; khatni Rev. 12:17 hei kida o. Khou hei ringhbamv chamvraeng lam khatni daihmei howthoumei lam tabui nchin lou bo?

Gen. 3:15 lev Rev. 12:17 nchamcmei tei thay o: Thaanngangc (nrui), howthoumei (kalung puamc the); kakik ta (ntumei pui kiktaa); Eden khou ntumei pui lev Rev. 12:17 khou ntumei pui lev ncham e. Eden khou howthou thao kanmei tei kandi luai maksaanv tatkey puni the. Nrui ta kapi diangc piakna nkhamh puinungc sw amaan puni the. Mi hei Ndaohloumei buk khou nthanna hylou the. Simei gaymei ninting gut louna paapc khou keyloumei ta thuaklou dat khang lwmgaymei tei thaorey khou rui tinai lou the. Mi tuang lwmgaymei tei ntao aniu latow ngam nuh the.

Eden khou paapc keylou puizaeng rui paapc khatni simei naithao khwan sini Ravguangc rui ringhbamv chamvraeng nchin loumei tei adih kam zaenggay tuang cho?

Baanzaneic

Ginkihbw 7

MAANSEI TUANG SAN

Gen. 3:15-24 hei pac o, paap khou keylou pui thai Adam lev Eve khou tabui pat kan tha?

Ravguangc latzan rui nrui ta kasiang lou the (Gen. 3:14). Maansei ta thu kasiang lou makge. Kasiang lou datmei rui kandih ta e (Gen. 3:17). Mi hei nrui ta kasiang loumei lev nchamc makge. Ravguangc tuang chamvraeng khou lwmgaymei tilou khang rui e.

Eve tuang paap hei nrui ta nduangh khou rui the. Kum tina nrui ta lev latzan sw kariu tuang the. Gen. 3:16 lat hei Gen. 3:15 tangv hy makge tiky Mesiah puan nimei Gen. 3:15 lat hei Gen. 3:16 lev pac kariu nina e. Ntumei pui rui ryanra na kabung sucna kanac puanc nimei tei ringhbamv tuang gaymei biak thu la khang e.

Nggaanmei paap tei ntumei pui lat chu khou rui e Ravguangc lat chumak khou rui e. Kumpuizaeng rui kata kasiamhloumei kandic ta tei kasiang lou the (Gen. 3:17). Kumna kapanty saanv khang nggaanmei tei taniang khou gut dat maksaanv taanv taanc nina the (Gen. 3:17-19). Mi tei maansei khou patzath lak nituang khwan e, Ravguangc tuang chamvraengv ham khwan e.

Adam tei theihmei khou rui duakdat puichaeng mak khe tiky kanou rui puancnimei ngana paan rui ringcdat khang lwmgay khwan e (Gen. 3:20). Theihmei panty khou kanei lwmgay na lungc khwan e.

Nzian thaymei puipu kumc Ravguangc rui kanei khang gay khang rana taanc lou khwan e. Ntao thu kanei simei ta thay the, kumna Ravguangc rui kanei ta thuakdat khang taanc puni the. Kanei ruc khou latzan keylou khwan sini lwmgaymei tei nai the. Thayna thayna Ravguangc lat twanlyam khwan sini Ravguangc lat ta, karam nzian ta lwmsi khang mak khwan  e

Ningting twmei hei gay e twna aniu ning e tiky mi hei tabuizaeng gay duth-duth mak tuang cho? Aniu rui thaymak sini gaynimei ningting kiu tabui cho?

Kachaekc Neic

Ginkihbw 8

Mbuna kakhanh lou khang: “Ringhmei thingbang” lev simei lev gaymei thaymei ningting tingthay bang kanei alammei tei kakhanh o. Mi tingthay bang kanei alammei lam thu “pikuan kachung khou” thao ngam e (Gen. 2:9). Kabam akhatna khou thao nchamcmei lam suangc mbumei thu simei lev gaymei thaymei ningting tingthai tei tu e thei – Ravguangc lat twalyamna mi tingthai tei tu khou rui ringhmei thingbang thay tei titu dat mak khe. Mi riak hei nthukmei lam the. Ravningmei tuang riak khou aniu rui kapah na taanc bammei hei panty khou kathiu timei nai e. Solomon rui kana ta nchamna sa e, “Anac lev alatdanv hei amuc riu, kum e tiky nanglung rui alatdanv tei piu o. Mi hei rui nang khang panty lungsingmei khatni lungcsaengc lungcdaihmei tilou puni” (Prov. 3:1, 2). Mi tuang alammei hei guang nimei tingkauh Jerusalem khou tihow lou dat re. Khou tei chaengdai kachung khou ringhmei thingbang na thao bammei ti tihow lou e.

“Ravguangc rui Eve ta damclou khou nggaan mei lev nchamc rapna damc lou khwan e. Tiky nthanmei noucpuc tei khat-khat khou ngang lou karina lungc bam khwan e. Kanei gaanvneimei kakhanhna taanh pui ningting nai ngam khwan e. Kum e tiky Eve rui paapc taanc rey na bowkey pui tangv Adam rui karuc khou lungc nina the twna salou khwan the. Kagaan bangc khou bam nina the. Mi hei Ravguangc rui timei syang dam akhat the. Mi tei rui kakhang ryanra lakmei khatni puatrit sw the. Ravguangc rui nggaanmei khang tiloumei kanou ruc khou lungc nina the twmei ngam tei ni sinsw kadat kan the. Kangan makmei ningting rui maansei ta thuak dat khang chamvraengh na lunghlaic dat khang nchanvmei ganv luanneimei swna tilou khwan the” Testimonies for the church vol. 3, p, 484.

Kaphianh nchamc nimei latthanv:

  1. Eve rui simei lev gaymei thaymei ningting tingthai tei tulana kakhang ningting latow pung the twna tabuizaeng rui ning tuang cho? Aniu ni Ravguangc rui tiloumei suangc mbumei latow khang kalat twanlyam lana nchamc rapmei paap khou keylou mak khang akumh sw ni tuang cho?