Zirlai 12
June 11–17, 2022
JOSEFA, AIGUPTA RAM LAL
SABBATH CHAWHNÛ
June 11
Chângvawn: “Faraoa vêk chuan Josefa hnênah, ‘Ngâi teh, Aigupta ram zawng zawng chungah hian hotuah ka siam a che,’ a ti a,” (Genesis 41:41, NKJV).
Chhiar Tûr: Genesis 41:37–46; 42;43; 44; 45; 1 Lalte 3:12; Rome 5:7–11.
Josefa chu Aigupta ramah hruaitu a lo ni ta a, amâ ûnaute ngei chuan tu nge a nih hre lo vin chibai an la bûk dâwn a ni (Genesis 42). Benjamina hruaia rawn kîr leh tûra a ûnaute a hrilh hunah a ûnaute chu an inphahhniam ang a (Genesis 42), tichuan—hlauhthâwnawma Benjamina nunna a awm nia an hriat hunah (Genesis 44) he mi thiltithei tak, “Faraoa ang” nia an hriat hmâah hian khawngaihna an la dîl dâwn a ni. A tâwpah Josefan a nihna dik tak a puang ang a, chutih hunah chuan thil dik lo tak tak ti tho mah se, chûngte aṭang chuan Pathianin thil ṭha a thur chhuak a ni tih an la hre thiam ang.
Thil ngaihnawm deuh mai chu, hêng thil thleng hrang hrang indawtte hi Josefan dinhmun ṭhâ a chan theihna tûra duan chu ni tho mah se, a ûnaute pianthartîrtu pawh a ni tho bawk hi a ni. Kanaan ram aṭangin Aigupta ramah an zuk zin a, chuta ṭang chuan an pa Jakoba hnêna Josefa chanchin hrilh tûra an kîr leh te, harsatna an tawhte khân Josefa leh an pa Jakoba laka thil sual tak tak an lo tih tawhte kha a hriat chhuahtîr a; anni lakah mai pawh ni lo vin, Pathian huât zâwng tak thil an lo ti a ni tih pawh an hre chhuak hnuhnawh a. Khâng an thil tawn zawng zawng kha an chunga Pathianin hremna a lekah an ngâi hmiah a. Nimahsela, Josefan a ûnaute chu a ngâidam ta vek a, a ûnaute pawh an lâwm avângin an mittui a tla hial. Hê thawnthu ngaihnawm tak hian keimahni thinlung pawh a hneh a, ngaihdamna thuchah ropui tak kan dawng a ni.
SUNDAY
June 12
Josefan Dinhmun Ṭha A Chang Ta
Josefan Faraoa mumang khân Pathianin Aigupta rama thil tih nghâl mai a tumte chu a puang chhuak niin a ngâi a (Genesis 41:28). Nimahsela, a Pathian chu ring vê tûrin Faraoa hi a sâwm chuang lo. Thil tih nghâl ṭûl nia a hriat chu a ti ta zâwk a. Chu chu an ram sum leh pâi dinhmun sawh nghehna tûra ruahmanna siam a ni. Thil ngaihnawm tak chu, Faraoan Josefa ruahmanna siam zînga sum leh pâi dinhmun sawh nghehna tûr lam chauh a ûksâk hi a ni a. Hei hian Faraoa khân a mumanga thlarau lam zirlâi awmte leh Pathianin hnâ a thawhte tih vêl âi chuan a ram sum leh pâi dinhmun, ei leh bâr chungchâng chu a ngaihtuah zâwk tih a tilang.
Genesis 41:37–57 chhiar la. Josefan hlawhtlinna a lo chan tâknaaah khân Pathian lo chêt vêna eng nge awm?
Faraoan mawhphurhna la tûra Josefa a thlan chhan hi dik taka a mumang awmzia a hrilh fiah vâng leh, Aigupa rama harsatna lo thleng tûr a puan vâng ni ber lo vin, chu harsatna chin fel dân tûr chu a hriat vâng a ni a. Faraoa hnêna thurâwn a pêk hi a ṭha hlê a ni ang; Faraoa chauh pawh ni lo vin a chhiahhlawh zawng zawngte pawhin an pawm vek a ni (Genesis 41:37). Faraoan Josefa a thlan chhan hi Josefa sâkhaw mi êm vâng ni lo vin, a taka hna thawk thei tûr nia a ngaih vâng zâwk niin a lang a. Chutih rualin, Josefa-ah khân “Pathian Thlarau” a awm ngei a ni tih erawh a hre thung (Genesis 41:38). Mi vengvâ leh fing tak (Genesis 41:39) a ni bawk tih pawh a hria a, chu a finna chu Pathian hnên atâ a dawn a ni (Genesis 41:33; 1 Lalte 3:12).
Bible-a kan hmuhte hi khatih hun lâia Aigupta rama thil thleng nên khân a inmil chiah a. Faraoan hruaitu atâna Josefa a ruat pawh hi hmân lâi Aigupta ram sawrkâr kalphungah khân thil tih âwm loh tak a ni lo; ram hruaitu atân Faraoa dangte pawhin Aigupta rama rawn pêm lût ram dang mîte pawh an lo ruat vê tawh tho ṭhîn a ni.
Kum sarih lo awm tûr chu hnianghnâr kum niin “chhiar sên loh khawpa tam” buh an thar dâwn a (Genesis 41:49). An buh thar tamzia tehkhin nâna “tuifinriata ṭiâu vut zât” tih ṭawngkam a hmang hian Pathian malsâwmna an dawng a ni tih entîr (Genesis 22:17). Chu malsâwmna chu Josefâ nun bîkah pawh lo langin, amah malsâwmtu leh Aigupta rama malsâwmna rawn thlentîrtu Pathian chu thuhmun a ni tih chiang takin a lang. Josefan fapa pahnih a nei a, chûng a fapa pahnihte hming chuan Pathian awmpuina a chang a ni tih entîr a. A fapa upa zâwk hming chu ‘Manassea’ tih niin, chu chuan a rilru natnate kha lâwmnaah Pathianini a chântîr tih a tilang a. A naupang zâwk hming ‘Efraima’ tih hian a hrehawm tawrhte kha hlawhtlinna a chantîr tih a tilang bawk. Hei hi Pathianin thil ṭha lo tak pawh thil ṭha êm êmah a chantîr theih dân entîrtu ṭha tak a ni.
Kan nun dân aṭanga mi dangten kan Pathian awm ngeizia an lo hriat theihna tûr kawngte chu eng nge ni?
THAWHṬANNÎ
June 13
Josefan A Ûnaute A Hmachhawn
Genesis 42 chhiar la. Hetah hian eng thil nge thleng a, chû thil thleng chuan eng tiangin nge mihringte sualna leh thil dik loh tih kârah pawh, Pathian awm ngeizia a puan chhuah?
Ṭâm a tlâk avângin Jakoba pawhin Aigupta rama buh lei tûrin a fâte a tirh a ṭûl a. Thil inhmeh lo tak chu, hetiang thil rawt chhuaktu hi a fapâte ni lo vin, amah Jakoba zâwk a ni tlat mai hi a ni (Gen 42:1). Hê putar vânduai tak, a thunun theih bâk harsatna lo thleng tuârtu hian a hriat lâwk ni miah lo vin thil chi hrang hrang a tawng a. Chûng a thil tawnte chuan a thi tawh emaw tia ni tam tak a lo sûn tawh, a fapa nên a inhmuhtîr leh dâwn a ni.
Hetianga an inhmu leh hi Pathian remruat a ni a, chu chu thil pahnih avânga lo thleng a ni. A hmasa zâwk chu, Josefa mumang lo thlen dikna anga ngaih a ni a. Josefâ mumanga lo hrilh lâwk tawh: “in buhphalte chuan . . . ka buhphal chu chibai an bûk hlawm a” (Genesis 37:7) tih chu tûnah hian a lo thleng dik ta a ni. Josefa chu “Aigupta ram chunga hotu” (Genesis 42:6) ti leh “ram hotu” (Genesis 42:30, 33) ti te-a sawi a ni a. A dinhmun hi “lei sîa bawkkhupa amah chibai bûktu” (Genesis 42:6, NKJV) a ûnaute dinhmun nên chuan a inthlâu ta hlê mai. Hêng a ûnau sâwmte hian a mumang a sawi chhuah ṭum khân an lo nuihsawh vêl a, a taka lo thleng tûrah pawh an ngaihsak lo a nih kha (Genesis 37:8).
A pahnihna chu, hê an inhmuh khâwm lehna hi Pathianin an thil lo tih sual tawh a rawn chhân lêt lehna anga sawi a ni a. Hêng thil thleng pahnihte chanchin sawi nâna a ṭawngkam hman leh, a thil sawite hian phuba lâkna lam rawng a kâi hlê. “An inti a” (Genesis 42:21) tih thû hi Josefa dah bo dân tûr an ngaihtuah ṭum pawh khân an lo hmang tawh bawk a (Genesis 39:19). Josefa ûnaute tân ina khung an ni (Genesis 42:17) khân tân ina Josefa khung a nih kha min hriat chhuahtîr leh bawk (Genesis 40:3, 4).
Dik tak phei chuan, Josefa ûnaute pawh khân tûna an chunga thil thleng mêk hi kum 20 vêl kal taa an nâu chunga thil dik lo tak an lo tih rah kha ni ngêiah an ngâi a. “Anni chuan, ‘Kan nâu chunga kan thil tih kha kan thiam lo tak tak a nih hi, khawngaih tûrin min ngen ṭâwk ṭâwk lâia a thinlung manganzia hre reng chunga kan ngaihsak duh loh kha; chuvângin hê manganna hian min tlâkbuâk ta a nih hi’ an ti a” (Genesis 42:21).
Reubena thil sawi, “A thisen phubâ chu an lâ a nih hi,” (Genesis 42:22) tih hian a ûnauten thah an tum lâia “thisen chu chhuah suh u” tih thû a lo sawi kha a hriat chhuahtîr leh ngei ang. Chutiang chuan, tûna an chunga thil thleng mêk hi tûn hmâa thil sual an lo tih tawh vânga lo thleng a ni tih an hre chiang hlê a ni.
Kan zînga mi tam zâwk hi chuan pawi kan tih leh hnuhnawh êm êm thil eng eng emaw kan lo tih tawh hlawm ngei ang. Chûng thil dik lo kan lo tih tawhte chu engtin nge a theih ang angin kan siam ṭhat leh theih ang? Engati nge Isua zâra Pathianin ngaihdamna min tiamte hi kan tâna thil pawimawh êm êm a nih?
THAWHLEHNÎ
June 14
Josefa leh Benjamina
Jakoban Rakili nêna an fa la dam awm chhun, tûna a hnêna awm mêk Benjamina Aigupta rama zuk kaltîr chu a hreh ngang mai a. A ûnaupa Josefa a lo chân tawh bawk sî nên, ani pawh chân vê leh mai a hlâu a ni (Genesis 43:6–8). A inah ei tûr a awm ngang tâk lohah (Genesis 43:2) leh, Judan him dam taka rawn hruai leh a tiam (Genesis 43:9) hnû-ah chauh Aigupta rama an zuk kal leh a, an ruâla Benjamina pawh kaltîr vê a phal ta hrâm a ni.
Genesis 43 chhiar la. An zînga Benjamina tel vê tâkah khân eng thilte nge lo thleng le?
Benjamina tel vê khân boruak a luah hneh hlê mai. A ûte zawng zawng nên Josefa hmâah an ding tlang vek a; mahse, Josefan a hmuh awm chhun chu amah chiah a ni (Genesis 43:16). Benjamina chiah hi a “ûnaupa” tia sawi a ni (Genesis 43:29, NKJV). Benjamina hi chu a hming lam meuha koh a nih lâiin, a ûnau dang zawngte erawh an hming a sawi lang lo; “sâw mîte saw” tiin a sawi tawp mai a ni (Genesis 43:29, NKJV).
Josefan “ka fapa” tiin a ko va, hei hian a hmangaihzia leh a ngainatzia a tilang (Genesis 43:29; Genesis 22:8). Pathian “khawngaihna” chang tûrin a duhsakna a hlân bawk a (Genesis 43:29); hei hian a chunga khawngaihna lantîr tum miah lo (Genesis 42:21) a ûte laka khawngaihna a dîl kha min hriat chhuahtîr a. Josefa hi chuan a ûnau dangte lak aṭanga a dawn loh khawngaihna kha Benjamina hnênah hian a lantîr a ni.
Josefa ûnauten an kal hmasak ṭuma tangka pêk kîr an nih avâng khân lung inah khung an nih mai an hlauh êm êm lâiin, Jesefa erawh chuan Benjamina a tel vê avângin an tân ruai a lo buatsaih zâwk a. Benjamina hian a ûnaute a chhanhim pawh kan ti thei ang chu. Ruâi chu an kîl ta a, a upat dân indawtin an ṭhu tlar a, an zînga naupang ber Benjamina, a ûte zawng zawng chanvo belhkhâwm lêt ngâ âia tam chantîra chu Josefa hnaih berah ṭhuttîr a ni a (Genesis 43:33, 34). Mahse, hetianga duhsak a hlawh bîk hi a ûte chuan an thîk chuang lo. Hmânah kha chuan an pa Jakoban an nâu Josefa a duât bîk kha an thîk ṭhîn hlê a; an nâu ngei leh an pa putar tawh lakah thil râpthlâk tak an tih phah a nih kha (Genesis 37:3, 4).
“Benjamina duhsakna a pêk hi a ûten a chunga îtsîkna leh huâtna an neih kha an tlum ber chungah an la nei leh neih loh a fiah nân a ni. Josefan an ṭawng hrethiam lo tûra an la ngaih fo avângin zalên takin an tî tî bawrh bawrh a, an rilru dik tak a hriat phah a. Fiahna dang a la siam ta cheu va, an chhuah hmain a naupang ber ipah a tangkaraw no dah tûrin a hrilh a.”—Ellen G. White, Thlahtubulte leh Zâwlneite, p. 219.
NILÂINÎ
June 15
Tangkaraw No
Genesis 44 chhiar la. Eng vângin nge Josefan tangkaraw no kha a ûnau dangte ipah ni lo, Benjamina ipah kher a dah?
Hê thawnthu hi a hma chiaha mi nên khân a inang khawp mai. A hmâa a lo tih tawh dân ang chiah khân Josefan ûte ip chu an phurh theih tâwka khata buh dah tûrin a in enkawltu chu a hrilh leh a. Mahse, tûn ṭûmah hi chuan Benjamina ip-a a tangkaraw no dah tel tûrin a hrilh ta thung.
Tûn ṭuma thil thleng hi chu a danglam bîk a. An zin hmasak kha chuan Josefa ûnaute hi an ruala Benjamina kaltîr vê tawh tûrin Kanaan ramah an kîr a nih kha; tûnah erawh Josefa hmachhawn tûrin Aigupta rama an kîr leh a ngâi ta thung a. A hmâ kha chuan Josefâ ûnauten anmahni ip ṭheuha thil inang lo awm chu an hmuh vek lâiin, tûnah chuan Benjamina ipah chiah Josefâ tangkaraw no a lo awm ta thung. Benjamina hi a û Josefan ruai a buatsaih ṭum khân chanvo ṭha bîk chantîr a nih avângin Josefâ no pawh hmang ve phâk a ni a. Mahse, tûnah chuan no rutû-a rinhlelh ber niin, lung ina tân mai hmabâk a ni ta a ni.
Aigupta mîte chuan hetiang tangkaraw no hi thurûk hriat theihna nia ngâiin an roh hlê ṭhîn a. Mahse, Josefan chutiangin a ring vê lêm lo vang. “An sualna an hriat theih nân Josefan hei hi a ti a. Pathian thiltihtheihna nei angin a la inchhâl ngâi lo va; mahse, an nuna thurûkte a hre vek thei a ni tih an rin a duh a ni.”—Ellen G. White, Thlahtubulte leh Zâwlneite, p. 220.
Hê no mak tak mai hi Josefan Pathianin hnâ a rawn thawh theihna hmanrua atân hmangin, a ûnauten an thil sual lo tih tawh avânga inthiam lohna an lo neih chu a duh ber a ni a. Chutiang chu Judan a lo sawi fiah dân pawh a ni chiah rêng bawk, “Pathianin i chhiahhlawhte sualna chu a hmu chhuak ta a nih hi,” (Genesis 44:16) a ti a nih kha. Hê a no roh êm êm mai lo rutu chu na takin hrem pawh lo ni se, a âwm ngawih ngawih a, chu tak chu a ûnau dangte rilru fiahna hmanrua atân hman nghâl a tum bawk a ni.
Josefa ûte pawi tihzia leh lungngaihzia han hmuhin, mi danglam an ni tawh tih chiang takin a lang a. An zavâiin Benjamina hi an ngaihtuah êm êm vek a, Josefa ang khân an chân leh ang a, thil sual tih nei miah lo ni mah se, Aigupta ramah bâwih a lo ni vê leh mai ang tih a hlâu hlê. Chuvâng chuan, thil sual tih nei miah lo Isaka “âia” berâmpa hlan a lo ni tawh (Genesis 22:13) ang chiah khân, Juda pawhin Benjamina “âiah” amah chu bâwiha la mai tûrin a ngên ta a (Genesis 44:33). A tih chhan pawh a pa chunga “chhiatna” lo thleng tûr chu a ngaih ngam hlawl loh vâng a ni (Genesis 44:34).
Eng tiangin nge Judan a nâu Benjamina tuâr âi tuâr tûra a inpêkna hian Kristan min hmangaih avânga kan âi a lo awh tawh dân kha a târ lan le (Rome 5:8 en ang che.)?
NINGÂNÎ
June 16
“In Ûnaupa Josefa Kha Ka Ni E”
Genesis 45 chhiar la. Hê thawnthu aṭang hian eng ang hmangaihna, rinna leh beiseina thûte nge zir chhuah tûr awm?
Judan a pa, (Hebrai ṭawngin ’avi) chunga “chhiatna” thleng tûr a hmuh ngam loh thû (Genesis 44:34) a sawi chiah hian Josefa chu a rawn “ṭap chhuak” ta hawm hawm mai a (Genesis 45:1, NKJV); chutichuan, a ûnaute hnênah Josefa a ni tih “a inpuang” ta a ni. “Inpuâng,” “inlâr” tih ṭawngkam hi mihringte hnêna Pathian a rawn inpuan thu sawina atân hman ṭhin niin (Exod. 6:3; Ezek. 20:9), hemi ṭum hian Pathian pawh a rawn inpuang a ni tih kan hre thei a. A awmzia chu, mihringte hian thil dik lo leh âtthlâk tak tak ti ṭhîn tho mah ila, Lalpan engkim chungah thû a nei tih a lantîr tihna a ni.
Josefa ûnauten an thil hriat leh hmuhte chu a tak ngei a ni tih an ring thei lo. Chuvâng chuan, Josefa pawhin, “In ûnaupa Josefa, Aigupta rama luhpui tûra in hralha kha ka ni” (Genesis 45:4) tia a hrilh kher an ngâi a. “Aigupta rama luhpui tûra in hralha kha ka ni” tih thu a sawi hnû-ah chauh an âwih thei ta a ni.
Chutichuan, “Pathianin in hmâah min lo tîr hmasa a nih hi” (Genesis 45:5) tih thû a sawi leh a. Pathian hming a lam tel hian chhan pahnih a nei. A ûnaute hnênah khân an chungah rilru dik lo a pu lo a ni tih a sawina a nih bâkah, Pathianah rinna leh beiseina a nei a ni tih a târ lanna pawh a ni bawk a. A chunga thil ṭha lo tak an lo tih kha “chhandamna ropui” leh an chhûngkaw “chi thlahte” zuah zêl a nih theih nân thil ṭûl tak a nih vâng a ni (Genesis 45:7).
Chutichuan, Josefan a ûnaute chu a pa hnênah kîr thuai a, Aigupa rama rawn hruai thla tûrin a hrilh ta a. An lo thlen huna an “chênna” tûr hmun pawh hrilh sâ vekin, thlâiten an ngeih êm êm, Aigupta rama a ram ṭha lâi ber Gosen-ah awmtîr a tum a ni (Genesis 45:18, 20). An lo kalna tûrin tawilâilîrte a hawntîr bawk a, hei hian a pa Jakoba chu hminin, a ûten an thil tawn an sawite chu dâwt a ni lo tih a rintîr dâwn a ni (Genesis 45:27). Jakoban tawlâilîrte a lo hmuh chuan Josefa a la dam ngêi a ni tih a ring ngam ta a, amah hmu tûra Aigupta rama chhuk pawh a duh vê ta a ni (Genesis 37:35; 44:29 chhiar leh ang che).
Tûnah chuan thil eng kim a ṭha ta. Jakoba fapa sâwm leh pahnihte chu an la dam kim vek a. Jakoba chu “Israela” tia koh lo ni ta-in (Genesis 45:28), hêng thil thleng zawng zawngte hian Pathianin a awmpui nasatzia chiang takin a târ lang a ni.
Josefa kha a ûnaute lakah a ngilnei hlê mai. Kan chunga thil ṭha lo tak thlentîr duhtûte chungah engtin nge khawngaihna kan lantîr theih ang?
ZIRTÂWPNÎ
June 17
Zir Belhna: Chhiar tûr: Ellen G. White lehkhabu, Thlahtubulte leh Zâwlneite-a “Josefa Aigupta-ah,” pp. 203–213; Josefa leh A Ûnaute,” pp. 214-224.
“Ni thum chhûng chu Jakoba fapâte hi pawi ti êm êmin a awm a. Tûn hmâa thil dik lo tak tak an lo tih ṭhin, a bîk takin Josefa laka râwng taka an lo chêt tawh dân te kha an ngaihtuah kîr a. Enthlatua thiam loh chantîr an nih a, an nih lohzia finfiahna mûmal phawrh tûr an neih bawk sî loh chuan, an zavâiin an thi phiar ang a, an nih loh vêk pawhin bâwihah tal chuan an tâng ngei ang tih an hre chiang hlê. An ruala Benjamina a kal vê theihna tûra an pa hmin chu an huphurh tlâng hlê mai a, a chhan pawh Josefa kha ransa kawlhin a seh hlum nia a ngaih vâng a ni.
Mahse, Josefa chu bâwih atân an hralh a ni zâwk reng sî a; tûnah chuan a chungah Pathianin phubâ lâin, bâwihah a ṭantîr vê dâwn taah a ngâi hmiah mai a ni. Josefa erawh hi chuan a pa bâkah, a ûnaute leh an nupui fanauten chaw ei tûr an nei lo ang tih a hlau hlê thung a, a chungah thil dik lo tak an lo tih tawh avâng khân an inchhîr hlê a ni tih pawh a hre chiang ta bawk. Amâ chunga an tih ang kha Benjamina chungah hi chuan an ti ve tawh dâwn rêng rêng lo va ni.”—Ellen G. White, Spiritual Gifts, book 3, pp. 155, 156.
“Josefa chu a lungâwi ta. A ûnauten an sual an sim tawh a ni tih a finfiah a, sual simna rah dik takte chu anmahniah chiang takin a hmu ta bawk a ni.”—Ellen G. White, Spiritual Gifts, book 3, p. 165.
Sawi Ho Tûr:
- In class-ah Ningâni zirlâi tâwpa zawhna kha en ho leh ula. Josefan chan ṭha lo chang lo ta se, a ûnaute chungah khân khawngaihna a lantîr duh tho ang em? A lantîr tho dâwn leh dâwn loh chu kan hre lo nâin, a chanchin aṭang hian eng ang nungchang pu mi nge a nih hrim hrim le? Chu chuan mi ngilnei tak a ni tih engtin nge a sawi fiah?
- Eng tiangin nge Josefa kha Krista leh Krista thil la tawn tûrte lo entîrtu a nih?
- Josefan a ûnaute a fiah a. Eng tiang kawngtein nge keini pawh hi Pathianin min fiah vê ṭhin?
- Khâng kum tam tak chhûng khân Josefa ûnauten Josefa chunga thil dik lo tak an tih avânga inthiam lohna an nei ṭhîn a. Hei hian mahni inthiam lohnain thil a tihtheihzia engtin nge min hrilh? Ngaihdam theih leh Pathian ngaihdamna pawm thei chu ni tho mah ila, engtin nge keimahni hi, ngaihdam phû lo ni eng ang mah ila, inngaihdam dân kan zir theih ang?