Lesson 8

May 14–20

Ku∙rachakani

SABBATH ATTAM

May 14

IA ANTINI LESSONNA PORAIANI: Aba. 22:1–12; Aba. 22:8, 14, 19; Aba. 23; Aba. 24; Aba. 24:67–25:1–8.

MINGANI POD: “Aro Abraham budepa, aro uni bilsi re∙angbeaha. Aro Jihova pilakni gimin Abrahamna pattiaha.” (Aba. 24:1).

 

ISOL AN∙TANGNI KU∙RACHAKANIKO RAKKIAHA: Sara depanteko man∙aha. Ia somoio Abraham budepa ong∙e bilsirang re∙angbeaha. (Aba. 21:2). Abraham bi∙sako Ishak mingaha. (Aba. 21:1–5 ona poraibo). Indiba Abrahamni golpo bon∙kujaenga. Abraham Ishakni dal∙ahao, uko Moria a∙briona rimangaha. Uano, Abraham Ishakko Isolna hom boli on∙na nangachim. Bon∙chotao, Isol Ishakni biapo do∙bok bipa mangsako on∙aha. (Aba. 22:13). Mes an∙chingna iako mesoka je, Isol an∙chingko jokatna daksamsoaha. Ishakni a∙sel Isol manderangko pattina skaha. (Aba. 22:17, 18). Ua pattianiara, beben, Jisu ong∙a. (Wat. 13:23). Isolni mandeko jokatna daksamsoani bidingo ia golpo an∙chingna Sastroni bebeko bang∙e talata.

Ishakko Isolna boli on∙na rimangaoni adita somoirangni ja∙mano Sara siaha. (Aba. 23). Ishak ia somoio jikgipa ra∙kuja. Uni gimin Abrahamni mikkangchi janggi tangani ka∙dongagri ong∙naba donga.

Abraham an∙tangni nokkol Eliezerko ge∙ete Ishakna jikgipa sandichina watataha. Eliezer Ishakna Rebekako rimbaaha. (Aba. 24). Rebeka depante sakgniko man∙aha. (Aba. 25:21–23). Abraham bia ka∙taiaha. Uni jik gital, Keturah, bang∙e bi∙sa man∙aha. (Aba. 25:1–6). Ia antio, an∙ching Abrahamni gimin poraigen, chong∙motan, Moriaoni uni siaona segimin golpoko poraigen. (Aba. 25:7–11).

ROBIBAR

May 15

MORIA A∙BRIO (Aba. 22:1–12)

Abrahamko Isolni dake niani miksonganiara mai? Ia golpooniko an∙chingara mai skie ra∙aniko man∙gen? Aganchakanina, Aba. 22:1–12 aro Ibri. 11:17 ko poraibo.

Isol Ishakko Una boli on∙china Abrahamko ge∙etaha. Ia ge∙etania Sastroni nangchongmotgipa niamni kosako re∙badiaba mo? Isol An∙tangni manderangko gipin manderangko so∙otna beng∙a aro uamangko Una boli on∙aniko beng∙a. Indide ia bilakgipa aro neng∙gipa bewalo Isolara maina Abrahamko dake niaha?

Skanggipao, Sastroo dake nianiara maiachim, uko u∙ichengna nanggen. Unosa, rakgipa sing∙anirangna aganchakaniko an∙ching ma∙sibatgen. Sastroo, dake nianio bakgni donga. Sastroo dake niani skanggipa bakde nang∙ni ka∙tongko nianian ong∙a. (Deut. 8:2; Aba. 22:12 baksa nisusabo). Gnigipa bakara dake nianiko man∙gipa mandena Isolni ka∙sachakaniko mesokanian ong∙a. (Reo. 20:18–20).

Uni gimin, ia dake nianio, Abraham kengniko ra∙chakaha. Abraham Ishakko boli on∙ahaode, Abraham ku∙rachakani chu∙sokjawaha. Indiba Abraham dake niani miksonganiko ma∙sisokjaoba, Isolo ka∙dongchakaha. Bebera∙aniara nikkugijao ka∙donganian ong∙aba mo?

Sastroo agangipa bebera∙aniara Isolna on∙pilskaani bidingo ong∙ja.Beben, Isolna on∙pilskaania nangchongmotgipa ong∙a. (Rom. 12:1). Indiba Sastroo agangipa bebera∙aniara Isolo ka∙dongchakani aro Uni ka∙sachakaniko ra∙chakanikosa miksonga jekon an∙ching man∙na krajachim.

Ia Sastroni nama kattako an∙ching Moria a∙brini golpoo nikna man∙a.Ia somoina skang, janggi tanganio Abrahamni nama kamrangko niate nibo. Abraham nama kamrangko bang∙bee dakaha.Ua gipin manderangna ka∙saani kamrangko ka∙e dakchakaha.Da∙o, ua Moria a∙briona an∙tangni depante baksa re∙angaha. Beben, ia songreaniara Abrahamko gisiko dongtoatjaha maina uano Ishakna mai ong∙genchim, uko ua ma∙sija.Indiba iarangoni mingsamangba Abrahamko jokatna gita chu∙ongjaha. Maini a∙sel? Maina Jihova An∙tangan hom bolina mes bipako donsoaha.Ia mes bipa an∙chingna ia ka∙donganiko on∙a, chong∙motan, Jisusan mangmang an∙chingko jokatna ama.

Ia golpoo Isolni ka∙sachakanikoba an∙chingna mesoka.An∙chingni namgipa cholon bewalrang aro kamrang an∙chingko jokatja.Jisuni katta maniachisan mangmang an∙chingko jokatna ama. (Eph. 3:8;Rom. 11:33 baksa nisusabo).

Abrahamni golpooniko bebera∙ani gimin an∙chingna maiko skia? Bebera∙aniko an∙chingara maikai mesokgen?

SOMBAR

May 16

ISOL ON∙GEN (Aba. 22:8, 14, 19)

Abraham aro Ishakna on∙na nangako on∙gen ine Isolara maikai An∙tangni ku∙rachakaniko rakkiaha? Isolara uamangna maiko on∙aha? Aganchakanina, Aba. 22:8, 14, 18 rangko poraibo. 

Hom bolina banoniko mes bi∙sako man∙gen ine Ishak an∙tangni pagipao sing∙aha. Abraham an∙tangni depantena aiao inmangipa aganchakaniko on∙aha: “Homna do∙bok bi∙sako Isol an∙tangan donsogen, ang de.” (Aba. 22:8). Ia podko indineba sena gita man∙gen: “Isol An∙tangkon Mes Bi∙sa dake on∙gen.”

Abrahamni aganchakanian Isolni jokatna daksamsoani bidingo an∙chingna mesoka.Jihova An∙tangan duk chake an∙chingni paprangna sichakgen!

Moria a∙brio Abraham aro Ishakni golpoan chisolo ong∙gnigipa obostako an∙chingna mesoka. Johan 1:1–3 aro Rom. 5:6–8 rangko poraibo. Chisolo ong∙gipa obostarangko u∙ina ia podrangara maikai an∙chingna dakchaka?

Moria a∙brio, Abraham an∙pile niaton, uni janggilchipak do∙bok bipako nikataha. “Unikoa Abraham nichaoaha; aro nibo, an∙tangni janggilchini buduo grongo ke∙enggipa do∙bok bipa mangsako nikaha.” (Aba. 22:13). Ia mes bipa Jisuko mesoka jean bu∙suni mukutko stikahachim. Abrahamba ia mes bipao Jisuko nikengachim.Uni giminsa “Abraham ua biapni bimungko Jihova-jire mingaha.” (Aba. 22:14). Jisu An∙tangan an∙chingna sakkiko on∙a je, Abraham ua salo ua a∙brio mesko on∙anio Uko nikaha. Jisu indine agana, “ Na∙simangni pagipa Abraham angni salko nikna ka∙srokachim; aro uko nike katchaaha.” (Johan 8:56).

“Isol Abrahamko an∙tangni depanteko so∙otchina ge∙etaha. Maina Isolara Abrahamna ia rakbegipa dake nianiko on∙aha? A∙selde, Isol Abrahamni bebera∙aniko dake nina skaha.Isol An∙tangni manderangko jokatna Uni miksonganiko Abrahamna mesoknaba skaha. Ia dake nianio Abraham namen dukko chakna nangaha.Isol Abrahamko duk chakna on∙aha jedakode Abraham an∙tangni chagronggiminoniko mandeko jokatna Isolara An∙tangni Depanteko on∙anio baditan on∙ahachim, uarangko u∙ina gita man∙gen.”—Ellen G. White, Patriarchs and Prophets, jak 154.

Maikai Abrahamni golpoara chisolo ong∙gipa obostako nambate u∙ina an∙chingko dakchakgen?

MONGOLBAR

May 17

SARANI SIANI (Aba. 23)

Aba. 22:23 o, Rebeka atchiaha ine an∙ching poraia. Rebeka Ishakni jikgipa ong∙nasiengachim. (Aba. 24). Aba. 23 o, Sara siaha aro uko gopaha ine an∙ching poraia.Uni siani adita somoirangni ja∙mano, Abraham Keturako kimaha. (Aba. 25:1—4).

Sarani siani aro uko gopani biapara Isolni Abrahamna ku∙rachakanio maia nangchongmotgipa bak dongpaa? Aganchakanina, Aba. 23 ko poraibo.

Moria a∙brioni Ishakni re∙bapilani adita somoini ja∙manon Sara siaha.Sastro an∙chingna indine agana, “Sarani tangani bilsi bilsi ritchasa kolgrik sni ong∙achim.” (Aba. 23:1). Niam Gitchamo, pilak me∙chikrangoni Sarani bilsikosan mangmang Sastroo serikaniko dakaha.Ia u∙ianian an∙chingna iako mesoka je, Sara Abrahamni golpoo namen gisik on∙na nanggipa mande saksa ong∙a. Ua segipa baksa songrepaaha. Namana ba namgijanaba ua uni sambaon ong∙rongaha. Bebera∙anio changni chang chu∙sokjaomangba, ua uni janggi tanganio bak ong∙paaha. (Aba. 12:11–13).

Aba. 23 ni bang∙a bakrang Abrahamni Sarana bregipa gopramni gimin agana.Ia golpoo, uni siana bate uko gopgipa biapni gimin aganbataha.Sara Kanaan a∙songo siaha ine Sastro an∙chingna talata. (Aba. 23:2). Abrahamni nokdangoni Ku∙rachakgimin A∙songo sichenggipa aro gopako man∙chenggipara Sara ong∙aha. Uni gimin, Sarani sianiara Ku∙rachakgimin A∙song baksa nangrimani donga.

Sarana gopram biapko brena am∙o, Abraham Hethni depanterang baksa jegrikaha.Ia golpo an∙chingna iako mesoka je, an∙tangni jikgipako gopana batede ia biapna ua gisik nangbataha. A∙selde Abraham Ku∙rachakgimin A∙songon an∙tangni dongramko jringjrotna dakna skaha.

Aba. 23:6 ko poraibo. Manderangni Abrahamko inditan mandera∙aniko ia Sastroni podara an∙chingna maiko agana? Abrahamna aro uni janggi tanganina Isolni miksonganio, gipin manderangni Abrahamko mandera∙ania maina nangchongmotani ong∙a?

BUDBAR

May 18

ISHAKNA JIKGIPA RIMBAA (Aba. 24)

An∙chingni nikbagimin gita, Aba. 23 o an∙chingna Sarani siani gimin agana. Aba. 24 o Ishakni Rebekako jik kimani gimin aganskaa.Sarani sianiara Ishakni Rebekako kimani baksa nangrimani donga. Ia nangrimaniko an∙ching nianggen.

Ishakna jikgipako man∙ani bidingo Abrahamara maina jajrenga? Ishakko Kanaan me∙chik baksa bia ka∙atna maina Abraham sikjachim? AganchakaninaAba. 24 ko poraibo.

Abraham Isolni ku∙rachakaniko bebera∙aha.Uni gimin, uni deritchu su∙ritchurang Ku∙rachakgimin A∙songo songdonggen ine Abraham bebera∙achim. Iani a∙selsa Abrahamara Ishakni songdonggipa biapko Ku∙rachakgimin A∙songni a∙palo ong∙na nangnikjaha. (Aba. 24:7). Aroba, Isoloni Ishakni ka∙tongko chel∙atgipa mandeko kimna Abraham Ishakko nangnikjaha.Uni giminsa, Abraham an∙tangni nokkolko watate Abrahamni nokdangonikon Ishakna jikgipako sandichina aganaha. Ishak an∙tangni jikgipako uni ma∙gipa Sarani tambuona rimbaaha. Ishak Rebekana “ka∙saaha. Indake Ishak ma∙ani siani ja∙mano ka∙dimeaha” (Aba. 24:67). An∙ching ia golpooniko iako nikna man∙a je, ma∙gipani siani ja∙mano Ishak namen ka∙beaha aro duk ong∙aha.

Ishakni Rebekako bia ka∙ani golpoo bi∙anirang aro ku∙rachakanirangan gapaia.Ia nitobegipa golpooniko an∙ching Isolni ka∙saani aro mandeni jakgitelani bidingo bang∙bea skianirangko man∙a. Abraham an∙tangni nokkolko Isolni bimungo ku∙mikchetchina aganaha: “Salgi aro a∙ani Isol Jihovako minge … anga nang∙ko mikchetatgen.” (Aba. 24:3). Isolan salgi aro a∙ako ong∙atgipa ong∙a ine Abrahamni bebera∙aniko na∙simang nikengama (Aba. 1:1; Aba. 14:19)?

Unikode, Abraham “Salgini Isol” aro “ sa∙gre” ko janapaha. (Aba. 24:7). Ia minggni bimungrang an∙chingna, Moria a∙brio salgioni re∙bagipa Jihovani Sa∙greko mesoka.Ishakko so∙otaoniko Ua champengaha. (Aba. 22:11). Ia Sa∙grean pilak janggirangko sason ka∙gipa apsan Isol ong∙a.Uan Abrahamni nokkolko re∙dile Ishakna jikgipako basegen.

Ishakko bia ka∙na gita me∙chik baseaniko dakjanaba donga ine Abraham bebera∙a. Oe, Isol namen bilakgipa ong∙a.Indiba An∙tangko maniatna Ua darangkoba draja. Rebeka ra∙chakna ba jechaknaba man∙achim. Aro Isol uni baseaniko mandera∙genchim.Indake, ia golpoo Isolni an∙chingna on∙gimin jakgitele baseaniko an∙ching nika.

BRISTIBAR

May 19

ABRAHAMNA JIKGIPAKO RIMBAANI (Aba. 24:67–25:1–8)

Bon∙kamgipa sal somoirango Abrahamna ong∙a obostarangni golpoko Aba. 24:67–25:1–8 oniko poraibo.Ia golporang an∙chingna maiko mesoka?

Sarani siani ja∙mano, Abraham jik kimtaia. Rebekani Ishakko ka∙dimeataha gita uni jikgipa Sarani siani ja∙mano Abrahamko ka∙dimeataha. (Aba. 24:67).

Abrahamni jik gitalni bimungko Ketura minga. Ketura-ara sawa? An∙ching namedakede man∙sija.Sastroo Ketura aro Abrahamni depanterangko Hagarni depanterangko janapgipao apsan serikaha.Uni gimin, Hagar-an Ketura ong∙naba donga.Ishmaelko watataha gita Abraham Keturani depanterangkoba uamangni dal∙ahao nokoni watataha. Abraham an∙tangni simano, uni pilak gamko Ishaksa man∙rikgen ine pilaknan mesokna ua nangnikaha.

“Aro Abraham an∙tangni pilak gamkon Ishakna on∙aha. Indiba Abraham an∙tangni tangmitingon, uni jikgiterangni depanterangna on∙tiprakko on∙e salaramchi salaram a∙songona, an∙tang depante Ishakoni uamangko watataha.” (Aba. 25:5, 6). “Jikgite” ingipa katta an∙chingna iako mesoka je, Ketura Hagar gita apsan gadango ong∙aniko mesoka, aro uamang Sara gitade apsan gadango ong∙ja.

Aba. 25:1–4, 12–18 podrango, Ketura baksa Abrahamni man∙gipa dedrangni bimungrangko nika.An∙ching Ishmaelni dedrangrangkoba nika. Ia bimungrangko apsan serikani miksonganiara maia? Jajrengagrian ia bimungrang sakki on∙a je, Abrahamna ku∙rachakgiminko Isol rakkigen, chong∙motan, Abraham bang∙a jatni pagipa ong∙gen.

Ishmaelni depanterangni bimungrang ma∙chong 12 oni ong∙a. (Aba. 17:20 baksa nisusabo). Jakoboba depanterang sak 12 donga jemangonin ma∙chong 12 ong∙baaha. (Aba. 35:22–26). An∙chingni nikbagimin gita,Isol An∙tangni ku∙monggrikani niamko Ishmael aro uni dedrang baksa dakjawa. Isol An∙tangni ku∙monggrikaniko Ishak aro uni dedrang baksasa dakgen. (Aba. 17:21).

Indake, Isol An∙tangni ku∙rachakaniko Abraham baksa rakkiaha.Isol una depanterangko bang∙e pattiaha. Adita bilsirangna skang Isol Abrahamna indine aganaha: “Indiba na∙ade tom∙tomo an∙tangni pagitchamrangona re∙anggen, budepa namengon gopako man∙gen.” (Aba. 15:15; Aganprakgipa 6:3 baksa nisusabo).

Bon∙kamaonan, Jihova An∙tangni ku∙rachakaniko Uni kakketgipa nokkol Abraham baksa rakkiaha.Jihova Abrahamna Uni ka∙saaniko aro ka∙sachakaniko mesokaha.Niam Gitchamo, Isolni an∙chingko jokatani bidingo nambatsrange aro aiao inmane dakmesokgipade Abrahaman ong∙a.Jensalo an∙ching Uo bebera∙on, Uni ka∙sachakanichi Isol an∙chingko jokata.

SUKORBAR

May 20

CHANCHIDAPANI: Abrahamara Isolni dingtangmanchagipa katta ra∙timgipa ong∙a. Isol An∙tangni miksonganirangko Abraham baksa sualaha. (Aba. 18:17). Isolni mandeko jokatna miksonganiko Uni Depanteni sianichi jokatgen ine Abrahamna Ua mesokaha.

“IshakIsolni Depante Jisuko mesoksogipa ong∙aha.Isol a∙gilsako pilakni paprangna Jisuko papni bolina on∙gen.Jisuni gimin talatgipa Nama Kattako aro Uni mandeko jokatna daksamsoani kamrangko u∙ina Isol Abrahamko nangnikaha.Uni gimin, Isol Abrahamko dake niaha. Isol Abrahamko uni ka∙sabegipa depante Ishakko so∙otchina ge∙etaha.Ia dake nianio Abraham namen duko ong∙aha. Ia bewalo duk man∙china miksonga gnangan Isol Abrahamna on∙aha. Ia dake nianio chagronggimin duk aro jajrengaoni Isolni mande jatko jokatna miksonganiko ma∙sina gita Abrahamko dakchakgenchim.An∙chingko jokatna gita An∙tangni Depanteko on∙anio Isolara baditan on∙ahachim, uko Abraham ma∙siaha.Ishakko so∙otchina Isoloni re∙bagipa ge∙etaniko man∙anio Abrahamni dukko mamung baksa tosusagrikna man∙jawa.”—Ellen G. White, Testimonies for the Church, volume 3, jak 369.

“Abraham budepa ong∙aha. Ru∙utgijan sigen ine ua nichake dongaha.Indiba sina skang ua mingsako dakna nangkuengachim.Unosa uni dedrangna Isolni Ku∙rachakgiminko Ua rakkichongmotgen ine ua u∙igenchim. Abraham Ishakna jikgipako man∙e on∙na nanggenchim.Isol An∙tangni niamni bidingo u∙ianiko simsake rakkichina Ishakko baseaha.Seokgimin manderangni papgipa ong∙china Isol Ishakko baseaha.Kanaanni manderang miterangko olakkiachim. Uni gimin Isol An∙tangni manderangko Kanaan manderang baksa kimgrikna on∙jaha. Maina Kanaanni manderang Uni manderangko Uoni chel∙atsranggenchim. . . . . Abrahamnade Ishakna jikgipako baseanio namen simsakna nanggipa kam ong∙achim. Abraham uni depantena Isoloni chel∙atgijagipa me∙chikko kimchina nangnikaha. . . . Ishak an∙tangna nambatsranggipa jikgipako basechina pagipao ka∙dongchakaha. Ishak iako bebera∙aha je, Isol An∙tangan una jikgipako baseanio dilchongmotgen.”—Ellen G. White, Patriarchs and Prophets, jak 171.

CHANCHIGRIKNA SING∙ANIRANG:

  1. Ishakko so∙otna Abraham jechakjaha.Iako dakna baditan bebera∙aniko aro bilakaniko nangaha ine na∙simang chanchia? Ia golpoo maiarang nang∙ko aiao inmanata aro maiarang nang∙ni gisikko dongtoatja?
  2. Jakgitele baseani bidingora maiko chanchia? Kristianrang ong∙e an∙chingo maina jakgitele baseani dongna nanga? Basakobade manderang ong∙gija baseanirangko dakronga.Uamangni janggirangko jokatna Isol kam ka∙a ine ia golporangara an∙chingna maikai mesoka?