Lynnong 13

March 19–25, 2022

Ai Ba Ka Jingieit Shipara Kan Iaibteng

JANMIET SABBATON

Dkhot Baibl ban pynkhreh ia ka Lynnong:Hebru 13, Rom 12:13, Ephesos 5:3-5, 1 Petros 5:1-4, Hebru 2:9, Hebru 4:16, Galatia 2:20.

Dkhot Spel-lyndet:“To kan iaineh ka jingiaieit para bangeit”  Hebru 13:1

Ki Hebru 13 ka lynong ka dei ka jingkren pynkut jong ka jingkyntu u apostol; “to kan iaineh ka jingiaieit para bangeit”.  U la pynskhem lynter ha ka shithi jong u ba ngi dei ki dkhot ka longїng jong U Lyngdoh Syiem, U Jisu, kum ki para shynrang bad kynthei jong U.  U nongthoh u khlem mut ba ki nongsngap ki long tang ki kynhun kiba ia trei na ka bynta ka jingpynim tang shimet shimet bad U Jisu, hynrei kum ka longїng, ne ka sem ia kaba yn pynim ryngkat lang.  u Paul u la pynithuh ia ka kam jong U Jisu na ka bynta jong ngi kum “ka jingiaieit shi para.” U khlem “sngewlehrain ba un khot ia ki ki para” (Hebru 2:11).  Kumta ki riewngeit ki dei ban leh iwei ia iwei kumba U Jisu u la leh na ka bynta jong ki.

Ha ka shithi hi baroh kawei, ka jingiaieit shipara ka don “ban ia kyrshan iwei ia iwei” khnang ba yn ym don ba duh lehnohei ia ka jingaiei ka jong U Blei (Hebru 3:13, Hebru 10:24, Hebru 12:15-17).  Ha ka lynnong 13 ka kynthup ia kiba bun kiei kiei:  ka jinglehsbun (Hebru 13:2) kaba leit jngoh bad kyrshan ia ki koidi bad ia kito kiba la shah ban beiñ (Hebru 13:3), ban ñiewburom ka jingiashong kurim (Hebru 13:4), ban kiar na ka jingikwah (Hebru 13:5,6), ban kynmaw bad ban kohnguh ia ki nongialam jong ka balang (Hebru 13:7-17), bad ban duwai na ka bynta u nongthoh hi (Hebru 13:18,19).

*Pynkhreh ia kane ka kynnong na ka bynta ka Sabbaton, March 26.

SNGI NYNGKONG

March 20

Kaba Ieit Ia Ki Briew Jong U Blei

PuleHebru 13:1,2; Rom 12:13; 1 Timothi 3:2; Titus 1:8 bad 1 Petros 4:9.  Kaei ka kam jong ka jinglehisynei ha ka balang kaba nyngkong? 

Ka jinglong khristan ka dei ka jingiaid pilkrim kaba barabor ka shaniah ha ka jingleh isynei jong ki khristan bad kibym dei ki khristan.  Ka jingbthah “ban ym klet” ban pynpaw ia ka jingleh isynei bad jingsbun ka mut pyrshah ia ka jingpyrkhat bakla shaphang ka jinglehisynei hynrei ruh ia ka jingleh bym niewkor.

U Paul u khlem mut ba ka jingleh isynei ka mut tang ia ki para bangeit.  U pynkynmaw ia ki nongpule jong u baba ka jingkhot sngewbha ia ki nongwei don kiba khlem artatien ba ki la khot sngewbha ia ki angel (Hebru 13:2).  U don ruh ha ka jingmut ia ka jingwan jngoh jong ki lai ngut ki rangbah ia u Abraham bad ka Sarah (Genesis 18:2-15).  Ka jingtyrwa ia ka jinglehisynei ka thew ia ka jingiasam ruh ia ka jingdon jong ngi bad kiwei pat ki briew kiba shem jynjar, ia kaei kaba U Jisu u la leh na ka bynta jong ngi (Hebru 2:10-18).

Ka jingieit shipara ia kito kiba ha byndi kam thew tang ia ka jingkynmaw jong ki parabangeit ia ki koidi ha ka jingduwai ka mut ba ki parabangeit kin ai jingtngen lyngba ki jingpyndap ia ki jingdonkam ba kynja met bad kyrshan ruh ia ka mynsiem. Don ka jingma haba ngim niewkor ia ki koidi.  Kito kiba ai jingiarap bad kyrshan ia kito kiba la pynrem da ka imlang sahlang, ka pyniaryngkat ia ki lem bad kito ki koidi.  Ha kawei pat ka jingmut, ki kylla long ki paralok ba iashim bynta bad ki bad kiba pynlong ia lade ki batlot lem bad ki ha ka imlang sahlang (Hebru 10:32-34).

U Paul u batai da kaba pyndonkam ia ki dur bad ki ktien ban pynshlur ia ki nongpule jong u ha ka jingiadei bad ki koidi.  Nyngkong eh u nongthoh u pynkhih ia ki nongpule ia ka jingkyrshan jong ki ia ki para jong ki kiba mynshuwa.  Ki la long ki paralok ne nongiatrei lang bad kito kiba la shah lehbeiñ bad ba la pynpaw paitbah (Hebru 10:33).  Kaba ar, ka ktien “leh beiñ” ka pynsaw biang ia ka nuksa jong u Moses, uba la jied ba un shah lehbeiñ lang bad la ki briew jong U Blei ban ia kaban lehkmen ha ki jingsngewbha ba ka pop ka tyrwa. (Hebru 11:25).  Khadduh, u Paul u shim khia da kaba sngewthuh ia ka jingiaieit shipar.  U pynkynmaw ia ki nongpule ba ma ki ruh ki dei “hapoh ka met” (Hebru 13:3).  Ki mad ia ka juh ka jingeh kum ki briew bad ba dei ban leh ia kiwei kumba yn leh ruh ia ki lada jia ba ki don ha ka juh ka jingeh; kata ka mut ha byndi.  Kumta ki briew ki dei ban iarap ia ki jingdonkam jong ka met bad ka mynsiem jong kito ki koidi, bad ban pyni ba khlem la klet noh ia ki.

Kaei pat kaba ngi lah ban leh na ka bynta kito kiba donha ki byndi, la ki dei ki parabangeit ne kim dei?  

SNGI BA AR

March 21

Ka Jingikwah Bad Ka JIngklim Awria

PulebHebru 13:4.5; Loukas 16:10-18; 1 Korin 5:1; Ephesos 5:3-5; bad Kolosai 3:5.  Kiei kita ki jingbymman kiba iadei ha kine ki dkhot?

U Paul u maham ia ki nongpule pyrshah ia ka jingklim awria bad ka jingkwah lalot namar ki dei ki ar tylli ki nongpynjot ba khraw tam ia ka jingieit shipara.  Ha ka jingshisha ki nongthoh jong ka Testament kaba thymmai bad ki riewkhuid mynbarim ki tip bha ia ka jingeh napdeng jong ki.

U Paul u khot ba ngin ñiewburom eh ia ka jingshongkurim ha kaba ngi dei ban kiar na baroh kiei kiei kiba lah ban pynjot ia ka.  Kane ka jingkiar ka kynthup ia ka jingbatskhem khlem da pynkhein ia ki jingkular ka jingshong kurimbad na ki jingiaphet lok kibym myntoi (ia nujor bad Mathaios 19:9). Ka jingkyntu ban pynlong ia ka jingthiah kaba khlem bit tngit, ka kdew ia ka jingkiar noh na ka jingpynjakhlia ia ka jingshongkurim da ka jingialeh ba awria shabar ka longing.  Ka ktien “nongklim awria” ha ka Testament kaba Thymmai ka thew ia baroh ki jait jingklim (1 Korin5:9-11; 1 Korin 6:9,10; Ephesos 5:5; 1 Timothi 1:9,10; Jingpynpaw 21:8; Jingpynpaw 22:15).  Shuh shuh, ka pyrthei mynta kam don shuh ia ka jingñiew akor ia ki aiñ ka shongkha shongman.  La mih ki jinghikai ba sniew ba ki shynrang bad kynthei ki lah ban leh.  U Paul u maham jur eh, ba U Blei un bishar ia ki nongklim sih.  Ki riewngeit kim dei ban shah ia ka jinghikai ba sniew jong ka imlang sahlang ba kan rung hapoh ka jinghikai ba kynja Blei.

“Ka jingieit spah” ka long kawei na ki jingsniew ha ka pyrthei mynta.  Ha ka jingshisha, ha kawei pat ka shithi, u Paul u kren shaphang “ka jingieit spah” ba ka long u thied jong ki jingsniew baroh (1 Timothi 6:10).

Ki lad ban kiar na kane ka jingsniew ka dei ka jingpyrkhat kaba U Paul u la pynshlur ha kiba bun ki shithi jong u.  Nyngkong eh ki dei ban long kiba “sngewhun” bad kiei kiei kiba ki la don (2 Korin 9:8; Philipi 4:11,12).  Shuh shuh, ki khristan ki dei ban ngeit bad kdup ieit ia ki jingkular ba U Blei “un ym iehnoh da lei lei” ia ki (Hebru 13:5). Ia kane ka kular la ai ha kiba bun ki dkhot ha ki briew jong U bad ruh ha ngi mynta ki sngi (Jenesis 28:15; Deuteronomi 31:6,8; Joshuwa 1:5; 1 Khronikl 28:20).  Kumta, ia ki riewngeit la khot sngewbha ba kin ai ka jubab sha ka jingkular jong U Blei da ki ktien na ki Salm 118:6:  “U Trai u ha ka liang jong nga ngan ym sheptieng; u briew u lah ban leh aiu ia nga?”  Kane ka jingkdew sha ki Salm 118 ka long kaba iadei eh namar ba u nongrwai salm u pynpaw hangne ia ka jingshaniah baskhem jong u ha U Blei, watla u shah ia ki jingeh jingjynjar kiba shoh ia u da ki riewbymman.

Kiei ki lynti kiba ka imlang sahlang ba mynta ki pynjot ia ka jinglongkhuid ka shongkha shongman bad, ha ka juh ka por, kaba la pyndap ia ki briew da ka jingieit spah?  Ha kino ki lynti ba shisha kiba ngi lah ban iada pyrshah ia kine ki ar tylli ki jingsniew?  

SNGI BA LAI

March 22

Kynmaw Ia Ki Nongialam Jong Me

PuleHebru 13:7-17.Kaei ka jingiadei kaba ngi dei ban don bad ki nongialam jong ngi? 

Hebru 13:7-17, ka kynthup ia ka jingbthah ban burom bad kohnguh ia ki nongialam jong ka balang.  Ka sdang da ka jingkhot sngewbha ban “kynmaw” ia kito ki nongialam ba mynshuwa kiba la kren ia ka Ktien U Blei ha ki, bad ka pynkut da ka jingkhot ban “kohnguh” ia ki nongialam kiba mynta (Hebru 13:17).  Ki nongialam kiba mynshuwa ki dei kito kiba la ialap nyngkong eh ia ka Ktien bad kiba la sdang ia ka kynhun balang.  Ka jingkhot ia ki ban “kynmaw” kam thew tang ia ka bor jabieng ban kynmaw lane ka bor ban leh burom ia ki.  U Paul u batai ba ki dei ban “kymnaw” ia ki da kaba shimkhia ia ka jingmih jong ki jingleh jong ki bad ban pyrthuh bud ia ka jingngeit.

Ha u Paul, ka kam bakhraw jong ka jingkynmaw bad ka jingiaroh ka dei ka jingpyrthuh bud.  Ha kane ka rukom, u Paul u la pynlang shuh shuh ia ki nongialam barim jong ka balang ha ki kyrteng jong ki riewkhraw kiba la iaineh ia kiba ki riewngeit ki dei ban pyrthuh bud.  Kine ki kyrteng ki kynthup ia ki riewkhraw ka jingngeit jong ki Hebru 11 ka lynnong, bad U Jisu U long ka nuksa ba khraw tam napdeng baroh ha ka jingngeit, Hebru 12.  U nongthoh shuh shuh u kdew ba “U Jisu U long U juh mynhynnin, mynta bad sha ki bymjukut” (Hebru 13:8).  U ieng da ka jingiapher kaba khraw bad pyrshah eh ia ki nonghikai ba lamler kiba la pynkylla bad katba nangiaid ki por, ki jinghikai baroh ki kylla long ki “bapher” bad ba “khyllah” (Hebru 13:9).

Ka jingkhot ban kynmaw ia ki nongialam ha ki Hebru 13:7, la iaiban biang ha ka rukom kaba donbor eh ha kaba kut jong kane ka bynta.  Ia ki riewngeit la kyntu jur ba kin kohnguh ia ki nongialam namar ki la long ki nongialam ia ka mynsiem.  Ia ki nongialam la batai hangne kum ki pastors kiba peit ia ka jingbha jong ka jinglong ba kynja mynsiem jong ka balang, ka kynhun jong ki, bad kiban sa ai jingkheiñ ha U Blei na ka bynta ka jinglong ba kynja mynsiem (peit 1 Petros 5:1-4; 1 Korin 3:10-15).  Kumjuh shisha ruh, ba kane ka jinghikai ka dei ban rung ruh ha baroh ki nongialam balang kiba dei ha la ki kam ki kam.

Kane ka dkhot ka kyntu ruh ba kine ki nongialam ki dei ki nongaplangbrot kiba shakri hapoh jong U Jisu.  “U Nongaplangbrot bakhraw jong ki kynhun langbrot (Hebru 13:20).  Ka jingkyllum lang ia ka jingieit jingsumar bad ka jingiaineh ha ka jingkohnguh ia ki nongialam lane ka jingshaniah na ki dkhot kan wanrah ia ka jingkmen.  Kane ka mut ba ki nongialam ki lah ban shakri ia ki kynhun balang da ka “jingkmen” lane ba kin ai jingkheiñ ia ka kynhun jong ki sha U Blei da ka jingkmen ym da ka jingsngewsih.

Kaei kaba phi lah ban leh khnang ba phin pynkhlain ne pynbha ia ka jingiadei hapdeng ki nongialam bad ki dkhot ha ka balang jong phi, bad kumjuh ruh ha baroh kawei ka pyrthei?

SNGI BA SAW

March 23

Husiar Ia Ki Jinghikai Kiba Pher Bad Kiba Khyllah

Ia nujorHebru 13:9; Hebru 2:9; Hebru 4:16 bad Hebru 6:19,20.  Kumno ba ia ka jingaiei lah ban ioh?  Kumno ba ia ki dohnud jong ngi yn pynkhlain? 

Ka jingiadei hapdeng ka jinghikai ba lamler bad ka jingbam, la kren ia ki ha ki Hebru 13:9, kane kam dei ka jingpyniapher hapdengki jingbam bakhuid bad ki bymkhuid.

Balei?

Nyngkong eh, i kumba u Paul u khlem da pynleit jingmut eh ha ka shithi jong u shaphang ka jingpyniapher hapdeng ki jingbam bakhuid bad bymkhuid.  Ngi tip na Ki Kam 15 ka lynong ba ka balang kaba nyngkong ka pynskhem ba la pynim ia ki bangeit da ka jingaiei (Ki Kam 15:7-11) bad ba ki dei ban iaineh ha ki aiñ jingbam jingdih (Ki Kam 15:19,20).  Ka jingpyniapher hapdeng ka bam bakhuid bad kabym khuid bad kiwei pat ki aiñ jong ka Baibl kim ialeh pyrshah ia ka jingaiei.  Ha ka jingshisha u Paul u kren ba ka jutang kaba thymmai ka la buh ia ki aiñ ha ki dohnud (Hebru 8:10-12).  Kaei kaba u nongthoh u kren shai ka dei ba ia ki jingkñia ia ki mrad bad ki kam jingiasaid jong u lyngdoh ha ka jaka kyntang la bujli noh da ka jingkñia kaba khamkhraw bad ba la iasaid da U Rangbah Lyngdoh bakhraw tam U Jisu (Hebru 8:4,5; Hebru 10:1-18).

Kaba ar, kane ka dkhot ka iathuh ba u Paul u kren pyrshah ia ki bangeit ym namar ba ki kyndiah na ki jingbam, hynrei ba ki leh hok da ka jingkyrmen ban ioh ia ka jingaiei ne bainong (Hebru13:9).  U maham pyrshah ia ka jingiashim bynta ha ki dustur ki Jiw ne jingleh rukom ha ka bam ka dih ia kiba la ju lehkmen da ka jingkñia ia ki mrad ha ki templ ha kaba ki khmih lynti ban ioh ia ki bainong ne jingaiei.  Hynrei ia ka jingaiei ym lah ban ioh da kine ki dustur jingbam; ka jingaiei ka wan tang lyngba ka jingkñia bad ka jingiasaid jong U Jisu Khrist.  Ki riewngeit “ki don ka duwan” (Hebru 13:10), ka diengphna jong U Khrist, na kaba ki lah ban bam(Ioannis 6:47-58)

Ha ki Hebru “ka jingaiei” ka wan na ka khet jong U Blei (Hebru 4:16).  Kane ka jingaiei, kaba lyngba U Khrist, ka long  “u Narbah” “uba skhem bad ba shisha” ia uba la teh skhem ha ka khet ka jong U Blei hi (Hebru 6:19,20; ia nujor bad Hebru 4:16).  Dei kane ka jingaiei, ia kaba ngi iohpdiang da ka jingkñia jong U Khrist, kaba ai ruh ia ka jingskhem bad jingkyrmen bakhraw ha ki dohnud jong ngi.  Haba ka dohnud ka “la skhem” ha kane ka rukom, yn ym lah ban “shah pynkhih” da ki jinghikai thymmai (Hebru 13:9, lane kan “shah rong noh” ne jngai noh na U Blei (Hebru 2:1).

Puson bha ia ka jingkñia ba janai jong U Khrist.  Balei ba kaei kaei kaba ngi leh “pyntam” na kane ka jingkñia ka long pyrshah ia ka gospel bad ia ka jingaiei ia kaba ngi shem ha U Jisu?

SNGI BASAN

March 24

Leit Sha U Jisu Shabar Ka Jaka Shong Dara

Ia NujorHebru 13:10-14, Markos 8:34, Mathaios 10:38, Loukas 14:27, bad Galatia 2:20.  Kaei ka jingmut ban leit sha U Jisu shabar ka jaka shong dara?  

Ka jaka shabar ka khyrdop ka long ka jaka kaba jakhlia tam na ka jaka shong dara baroh.  Ia ki doh  jong ki langkñia baroh la thang hangta (Lebitikos 4:12).  Ia ki briew kiba don ñiangthohlieh ruh la beh noh shabar ka jaka shong dara (Lebitikos 13:46), bad ia ki nongshukor bad kiwei pat ki nongkamsniew la pyniap hangta (Lebitikos 24:10-16,23; 1 Ki Syiem 21:13; Ki Kam 7:58).  Kine ki aiñ pyrkhing i kumba ki pynpaw ba ka jingdon jong U Blei ka don tang hapoh ka jaka shong dara.  Kiei kiei ki bymkhuid la bret noh shabar namar ba U Blei um mon ban iohi ia kino kino ki “bymkhuid” lane “kibym itynnad” ban don hapoh (Jingkheiñ 5:3; Deuteronomi 23:14). 

U Jisu u shah ia ka kordit ha ka diengphna shabar ka Jerusalem (Ioannis 19:17 -20).  Kane ka pyni ia ka jinglehraiñ ia kaba la pynshet ha U (Hebru 12:2).  Ia u la pynrem kum uta uba la “krenbeiñ ia ka kyrteng U Blei” namar kata la rai pyniap da ki Israel bad la pyniap shabar ka kynroh (Markos 14:63,64; peit ruh Lebitikos 24:11,16).  Ia U Jisu la beh noh shabar ka jaka shongdara kum uba “khlemraiñ” “u bym khuid” ne “ubym itynnad” (Hebru 12:2).  U Paul u kyntu eh ia ki bangeit ban bud ia U Jisu shabar ka khyrdop, ban shah ia ka lehraiñ ia kaba u la shah (Hebru 12:2; 13:13).  Kane ka dei ka juh ka lynti kaba u Moses u la bud bad u la jied ban shah “ka jingshah u Khrist” ha ka jaka ka spah jong ka Ijipt (Hebru 11:26).

Kum ka pharshi, ki Hebru ka pyni ba ka jingdon jong U Blei mynta kadon shabar ka jaka shongdara.  Ka kam ban bud ia U Jisu shabar ka jaka shongdara ka mut “ban shah ia kaei kaba u la shah,” ne ka jinglehrain, hynrei ka dei ruh “ban leit sha U” (Hebru 13:13) kum kito ki khun Israel kiba “wad ia U Trai” ki la leit shabar ka jaka shongdara ha ka ri khlaw haba u Mosesu la weng noh ia ka їngdara jong U Blei napdeng ka jaka shongdara ki paitbah hadien ka jingialeh ha ka por u blei khun masi ksiar (Eksodos 33:7).  Kane ka jingbuh jingkynmaw ka mut ba ka jingkyntait ia u Jisu da ki bymngeit ka thew ia ka jingkyntait ia U Blei, kumba ki khun Istrael ki la leh ha ka por ka jingialeh pyrshah ba lamler da u khun masi ksiar (Eksodos 33).  Kumta ka lynti jong ka jingshah jynjar bad ka jinglehraiñ ruh ka long ka lynti sha U Blei.

U Paul u khot sngewbha ia ki nongpule ban bud ia UJisu kum “U Nongpynlong bad U Nongpynjanai” ia ka jingngeit jong ngi (Hebru 12:2),  kaba mut ruh ka jingkhot sngewbha ia ki ba kin shim bad mad ia ka jynjar mynta ha ka lynti kaba kin ioh mad ia “u soh ka jingsuk  jong ka hok” (Hebru 12:11).  Ki la ieh noh shadien ia ka nongbah kaba la jot ha ka jingsniew, ne ka jaka shongdara, ha kaban wad ia ka “nongbah kaban sa wan,” kaba la tei da U Blei hi (Hebru 13:14; Hebru 11:10,16).

Kaei kaba phi sngewthuh ia ka jingmut ban bud ia U Jisu “shabar ka jaka shong dara”?  kiei kita ki jingdonkam jong ka jingim jong ka jingngeit ha U Jisu kaba lah ban wanrah ia ka jingeh, jinglehraiñ na kito kiba don sawdong jong ngi? 

SNGI PYNKHREH

March 25

Pule shuh shuh:Hadien ka jingwanhiar jong U Mynsiem Bakhuid, ki riewngeit ki la shadkmen ha kata ka jingiadei kaba thiang eh bad ki para riewkhuid.  Ki long kiba sngur mynsiem, kiba sngewlem, kiba len lade, kiba la mon ban kheiñduh lut na ka bynta ka jingshisha.  Ha ka jingiadei jong ki kaba man la ka sngi iwei bad iwei pat, ki pynpaw ia ka jingieit kaba u Khrist U la ai ha ki.  Da ki ktien bad ki kam kibym khwan myntoi ki ialeh ban pynmeh ia ka ding jong ka jingieit ha ki dohnud briew.

“Hynrei suki suki ka jingkylla ka la wan, ki para bangeit ki la sdang peit ia ki jingtlot jong kiwei pat.  Da ka jingpyrkhat jong ki ia ki jingbakla jong kiwei, bad ailad ia ki jingkren sniew, ki la duh noh ia ka jingbyrshem jong ki sha u Nongpynim bad ka jingieit jong U.  ki la sdang ban kham pyrkhing pynban ha ki jingleh niam kiba shabar, khamtam tang ha ka jingtip ban ia ka jingim kaba shisha jong ka jingngeit.  Ha ka jingthmu jong ki ban pynrem ia kiwei, ki la matlah noh ban iohi ia la ka jingtlot la jong.  Ki la duh noh ia ka jingiaieit shipara ia kaba U Khrist u la khot ia ki, bad kaba sngewsih tam eh ka long, kim sngewthuh ia ka jingduh bakhraw jong ki hi.  Ki khlem sngewthuh ba ka jingkmen jong bad ka jingsuk ka la mih noh na ka jingim jong ki bad ba ki la shop noh shabar ia ka jingieit jong U Blei na ka dohnud jong ki, shen kin sa iaid ha ka jingdum”

U Ioannis u la sngewthuh ba ka jingieit shipara ka la sdang ban jah noh na ka balang, u la kyntu ia ki parabangeit ba ki donkam eh ban pynneh ia kane ka jingieit.  Ka shithi jong u sha ki balang ki dap tang da kane ka jingmut.  U thoh “Ko hep baieit, to ngin iaieit paralok hi naba ka jingieit ka long na U Blei. Te uwei pa uwei baroh uba ieit la kha ia u na U Blei bad u ithuh ia U Blei.  Uta u bym ieit um ithuh ia U Blei, naba U Blei U long ka jingieit.  Ha kane la pynpaw shynna ia ka jingieit U Blei ha ngi, ba U Blei u la phah ia la U Khun ba ka kha marwei sha kane ka pyrthei ba ngin ioh im da U.  Ha kane ka long ka  jingieit ym naba ngi la ieit ma ngi ia U Blei hynrei naba u la ieit ma u ia ngi bad ba u la phah ia la U Khun ban long ka kuna na ka bynta ki pop jong ngi.  Ko hep baieit lada U Blei u la ieit kumta ia ngi, ma ngi ruh ngi dei ban iaieit paralok hi.”  Ellen G. White, The Acts of The Apostles, pp. 547,548.

Ki Jingkylli ban ia Puson:

  1. Ka jingim khristan bunsien ka long kaba shimet shimet, ka jingiadei kaba shimet hapdeng ki bangeit bad U Jisu. Kane ka dei tang kawei na ki bynta jong ka jingim khristan. Balei ba ka long kaba donkam ban kynmaw ba U Blei u ialam ia ngi sha ka kynhun?  Kaei ka kamram jong nga ha ka kynhun?  Kaei kaba ngan khmih lynti na kane ka kynhun?
  2. Kiei ki dak kiba paw kiba bha tam eh ba ka jingieit shipara ka long kaba khlain ha ka balang? Pynkhreh ban iasam ha ka klass.
  3. Kaei ka jingieit shipara kaba shisha? Kiei kita ki jinglong jong ka kibawanrah ia ka jingmih ba bha? Kumno phin pyniapher ia ka hapdeng ka jingiaieit kaba shukor?