LYNNONG 12

March 12–18

Ban Iohpdiang Ia Ka Hima Ka Bymlah ban Pynkhih

JANMIET SABBATON

Dkhot Baibyl ban pyn khreh ia ka Lynnong: Hebru 12:18 29; Eksodos 32:32; Daniel 7:9,10,13 22; Haggai 2:6 9, 20 22; Salm 15:5; Salm 16:8; Hebru 13:15,16.

Dkhot Spel lyndet: “‘Naba kumta haba ngi pdiang ia ka hima ka bymlah pynkhih, to ngin ioh ka jingsngewthuh da kaba ngin a i ka jingshakri kaba pynsngewbha ia U Blei da ka burom bad ka jingtieng burom ”’” (Hebru 12:

Ki Hebru 12:18-29, ka lynnong na ka bynta kane ka taiew, ka long ka khlieh duh jong ka shithi.  Bad hangne la pynlang lut ia ki jinghikai da kaba iaiban ia kajingmut kaba la sdang.  U Blei u la kren ha ngi ha u Khun jong U, bad ngi donkam eh ban pynshahshkor biang biang (Hebru 1:1,2; Hebru 12:25) ia U.  Ka jingbatai shaphang U Jisu ha ki Hebru 12:22-24  ka pynskhem ia ka shithi jong ka jingpynbna paitbah shaphang jong U; U Jisu u long u Nongpyniasuk jong ka jutang kaba thymmai, bad ka snam jong u ka ai jingpynim ia ki ba ngeit.  Ka jingshakri Lyngdoh ba kynja syiem jong U na ka bynta jong ngi ka long ka daw bah jong ka  jinglehkmen ha ki paitbah bneng.  Bad khadduh eh, ki Hebru 12:25-29 ka kynthup ia ka jingpynkhraw kaba khadduh eh: Ka jingbishar jong U Blei ka la wan.  Kan wanrah ia ka jingpynjot ia ki nongshun jong U -bad ka jingpyllait bad ka jingaiti noh ia ka hima sha ki briew jong U (Hebru 12:28,29).

Kaba kut pat ka pynskhem ia ka jingdonkam jong ki jingtrei jong U Jisu ha ka diengphna bad ka ialam ia ki riewngeit sha ka jingkyrmen jong ka jingjop U Jisu ha ka jingwan arsien jong U.  U Paul u pyndonkam ia ki jingkren u Daniel 7 ka lynnong ban pynkynmaw biang ia ki nongpule ba U Jisu u la iohpdiang ia ka hima na U Blei, U Nongbishar (Daniel 7:9-14), bad un ai ia kata ka hima jong U ha ki bangeit jong U, “kita ki riewkhuid jong Uba Ha Khlieh Tam Eh,” kiba ban iohi kynti ia ka junom la junom duh.

*Pynkhreh ia kane ka lynnong na ka bynta ka Sabbaton, March 19

SNGI NYNGKONG

March 13

“Phi La Wan Sha U Lum Seion”

PuleHebru 12:22-24.  Kaei kaba U Paul u batai hangne? 

Ka shithi sha ki Hebru ka pynskhem ba ngi la wan sha u lum Seion ban ia shimbynta ha ka jinglehkmen kaba khraw eh.  “Hynrei phi la wan ha u lum Seion, bad ha ka nongbah U Blei baim, ha ka Jerusalem bakynja bneng bad ha ki bun paitbah ki angel kibym lah ñiew shuh” (Hebru 12:22).  Ngi la wan da ka jingngeit da ma ngi hi sha u nongmihkhmat jong ngi U Jisu.  Ha kane ka jingleh kmen ngi shem ia ki angel kiba ngim lah shuh ban ñiew, U Blei hi da lade, bad U Jisu Uba long u pdeng jong kata ka jinglehkmen.  Ngi la wan kum shibynta na kata ka “jingialang bakhraw jong ki khun nyngkong ia kiba la buh kyrteng ha bneng”  (Hebru12:23).  Ia ki kyrteng jong ngi la thoh ha ki kitab jong ka bneng, ha kaba ki briew jong U Blei ki don (Eksodos32:32; Salm 56:8;Daniel 12:1; Malakhi 3:16; Loukas 10:20; Jingpynpaw 13:8; Jingpynpaw 17:8).

Ngi dei ki “khun nynkong” namar ba ngi iohi bynta lem na ka bynta u khun nyngkong, U Jisu (Hebru 1:6).  Kumta ngi ia wan ym kum ki nongwei hynrei kum ki trai shnong (nujor bad Philipi 3:20).  La batai ruh ba ngi long ki “mynsiem kiba hok ba la pynjanai” (Hebru 12:23).  Kane ka jingbatai ka long ka kyntien ba pynpaw ia ka jinglong jong ngi ki briew ha kata ka por.  Ka dei ruh kaba pynpaw ba U Blei u long U Kpa jong ngi baroh, ki briew kiba sheptieng ia U Blei.

Ka jingiaseng bah kaba lehkmen risa ha lor ka jinglong syiem U Jisu, ka jingsynshar jong U bad ka jinglong Rangbah lyngdoh jong U bad ruh ka jingplie ia ka jutang kaba thymmai.  Ha ki Hebru, u lum Seion u long ka jaka ha kaba ia baroh kine ki jinglehkmen la leh.  Lai tylli na ki jingrwai ha ki Hebru 1:5-14, ki batai ia ka jingkiewkhet jong U Khun bad ba u shim ia U lum Seion kum ka jaka ha kaba la jia kata ka jingjia (Salm 2:6,7; Salm 110:1,2; Salm 102:21-27).

U Lum Seion u longruh ka jaka ha kaba ia U Khun la thung kum “U Lyngdoh sha ki bymjukut” (Hebru 5:6),  ka jingsot na ki Salm 110:4.  Katkum ki Salm 110, ka jingthung ia U Khun kum u Rangbah Lyngdoh ka jia ruh ha u lum Seion (Hebru110:2).  Khadduh ki Hebru ka kren ba ka jingplie noh ia jinglong lyngdoh jong U Jisu ruh ka buh ia ka dak jong ka jingplie ia ka jutang kaba thymmai (Hebru 7:11-22).  Kumta u lum Seion u long ruh ka jaka ha kaba ia ka jutang ba thymmai la pynskhem.  Hebru 12:22-24 ka batai ruh ia ka jingialang bah kaba la jia ha bneng haba u Jisu u la kiew noh.

Ha kano ka rukom kaba shisha ba ngi lah ban lehkmen ia U Jisu, ka jingshakri lyngdoh jong U, bad ka jutang kaba thymmai ha ka jingim  bad ha ka jingmane jong ngi?  Balei ba ka jingshadkmen ha kane ka jingshisha ka dei ban long kaba skhem? 

SNGI BA AR

March 14

Phi La Wan Sha U Blei, U Nongbishar Jong Baroh

Pule Hebru 12:23.  Lada kane ka dei ka jinglehkmen, balei ba ia U Blei la batai kum u Nongbishar?  Kumno ba u Nongbishar un don bynta ha ka jinglehkmen?  Pule ruh Daniel 7:9,10,13-22.

Ka jinglehkmen ia kaba la batai ha ki Hebru 12:22-24 ka thew ia ka jingbishar kaba ha ka lawei.  U Blei uba longU Nongbishar u la shong, bad ia ki kitab la pyndonkam, bad ka jingmih na kane ka jingbishar kaba na ki kitab ka long ba ki briew jong U Blei ki la ioh pdiang ia kata ka hima (Hebru 12:28). Ka jingithuhpaw pyni ia ka jingbishar shuwa ka jingwan kaba arsienkaba ha u Daniel 7, kaba pynpaw ruh ia ka jingbishar ha kaba U Blei Uba long “U Mynhyndai Kulong” (Daniel7:9) u la shong ha ka khet ding bad ia kaba la ker sawdong da ki “phew hajar sien phew hajar” (Daniel7:10) ki angel.  Ia ki kitab la plie (Hebru 7:10), bad ha ka jingbishar la rai sha ka liang jong “ki riewkhuid jong Uba Hakhlieh Tam eh” kiba la shim kynti noh ia kata ka hima” (Daniel 7:22). Kumjuh ruh, ki Hebru 12:22-29, ka batai ia ka jingbishar ha u lum Seion, ka Jerusalem ba kynja bneng, ha kaba iaU Blei, “U Nongbishar ia Baroh” la ker sawdong da ki “hajar phew hajar” ki angel.  Kane ka jingjia ka long ruh kaba ishyrkhei (Hebru 12:29).  Ka kynthup ia ki kitab namar ba ki riewkhuid ki “don kyrteng” hangta (Hebru 12:23), kaba thew ba ka jingbishar ka long ka jingai rai jingjop ia ki riewkhuid. U Jisu u long hapdeng jong kata ka jingbishar (Hebru 12:24).  Ia U la batai kum U Khun jong U Briew ha ki Hebru 2, ia uba la “pynphong pansngiat da ka burom bad ka bor” hadien ba u la shah ia ka “jingiap” na kabynta jong ngi (Hebru 2:9).  Katkum ki Hebru 2:10, U Khun jong u briew (peit Hebru 2:6) u la shah ia ka jynjar khnang ba un lah ban wallam ia kiba bun ki khun sha ka burom; kata ka mut khnang ba ia ki riewngeit ruh yn “pynphong pansngiat da ka bor bad ka burom”  “U Khun” mynta u la wallam ia ki riewngeit sha Seion, sha ka Jerusalem bneng, lyngba ki jingkyrkhu jong ka jutang kaba thymmai (Hebru12:22-24), ha kaba la kular ban ai ha ki ia ka hima (Hebru 12:28). Kumta kane ka jingbishar ka long ka khubor kaba bha eh ia ki riew ngiet namar ka dei ak jingbishar kaba synshar na ka bynta  jong ki.  Ka pynksan ia ki.  Ka dei ka jingbishar kaba rai pynrem ia ki nongshun, ia u iakjakor, uba long u tynrai jong u mrad khlaw kiba la pyniap beiñ ia ki riewngeit ha ka mynnonr (Daniel 7) bad kan long shisha kumta ha ka lawei (Jingpynpaw 13). 

Kumno ba kaei kaba ngi la ia pule mynta ka sngi ka iarap ia ngi ban sngewthuh ba ka jingbishar jong U Blei ha ka khubor ki lai angel ka long ka khubor kaba bha na ka bynta ka por kaba kum kane?  (JIngpynpaw 14:6,7; ia nujor bad Deuteronomi 32:36; 1 Khronikl 16:33-35)?

SNGI BA LAI

March 15

Pynkhih Ia Ki Bneng bad Ka Pyrthei

Hadien ba la batai ia ka jingialang bah kaba la jia ha bneng, u Paul u la maham ia ki nongpule ba ki dei ban pynshah shkor bha ia ka sur jong U Blei namar u Blei un sa kynruh “hooid sa shisien . . . ym tang ia ka pyrthei hynrei ia ki bneng ruh”  (Hebru 12:26.  U Paul u ong ba watla U Jisu u la shong ha ka khet ha bneng,  ia ka jingpynim na ka bynta jong ngi ym pat la pyndep lut.  Ngi donkam ban tip bha namar ba kane ka kam ka dang iaid shaphrang.

IanujorHaggai 2:6-9, 20-22; Salm 96:9,10; Salm 99:1; bad Hebru 12:26,27.  Kaei ka jingthmu jong ka jingpynkhih jong U Blei ia ki bneng bad ia ka pyrthei?  Ka mut aiu ruh?

Ha ka Testamen ka ba rim, ka jingpynkhih ia ka pyrthei ka long kaei kaei kaba ju jia na ka bynta ka jingdon jong U Blei, uba pynpaw ia lade ban pyllait ia ki briew jong U.  Haba ka Deborah bad u Barak ki la ialeh pyrshah ia u Sisera,U Blei iu la ialeh na bneng na ka bynta jong ki (Nongbishar 5:20).  Ia kane la batai kum u jumai uba khraw eh, ka jingkynruh ia ka pyrthei bad ia ki lumbah na ka bynta ka jingwan don lang jong U Blei (Nongbishar 5:4,5).  Ngi shem ia kane ka juh ka jingjia ba ka jia lyngba ka Testament kaba rim haba U Blei u la wan ban pyllait ia ki briew kiba la shah ban beiñ (Salm 68:7,8; Salm 60:2; Salm 77:17,18).  Kumta ka jingkynruh ka dei ka dak jong ka jingbishar jong U Blei kumba u pynpaw ia ka bor jong U halor u bynriew jong ka pyrthei.  U nongiathuhlypa u la kren lypa kane kan jia ha ka sngi jong U Trai (Isaiah 13:13; Isaiah 24:18-23).

Ha ki Hebru, ka “jingpynkhih” ia ka bneng bad ka pyrthei  ka kdew sha ka jingpynjot ia ki nongshun jong U Blei.  Kane ka dei kaei kaba U Blei u la kular ha ka jingpynkiew khet ia U Jisu.  U Blei u la ong ha U: “ To shong ha ka kti kamon jong nga, tadynda ngan pynlong  ia ki nongshun ia me ka jingiuh hapoh ki kjat jong me.”  (Hebru 1:13).  Kumta U Jisu u la jop halor u nongshun (Hebru 2:14-16) bad ba ia U la kyntiew khet (Hebru 10:11-14, 1 Korin 15:23-25).

Hynrei U Blei un sa pynjot ia kine ki nongshun ha la lawei, haba un pynkhih ia ki bneng bad ka khyndew.  Ka jingpynkhih ia ki bneng bad ka khyndew ka mut, ka jingpynjot ia ki bor jong ka pyrthei kiba pynshitom beiñ ia ki briew jong U Blei bad kaba kham kongsan, ka long ban pynjot ia ki bor bymman (u soitan bad ki angel jong u) kiba long ki nongaibor ha ki briew ha pyrthei ban ialeh pyrshah. 

 

Balei ba ka jingkular jong ka jingbishar hok kaba shisngi ba kan wan jia, bad ia u soitan uba la synshar bor bah ha ka pyrthei jong ngi yn sa pynjot thiaw ha kawei ka sngi, ba ka long ka jingkular jong kajingkyrmen kaba khraw khamtam na ka bynta jong kito kiba la shah ia ki  jingjynjar ha ka kti jong ki bymman? 

SNGI BA SAW

March 16

Ka Hima Kabym Lah Pynkhih

U Blei U la pynbna ba un sa “pynkhih” ia ki bneng bad ka khyndew, kaba mut ba Un sa pynjot noh ia ki hima ki nongshun.  Don kaei re kaei, ia kabym lah pat ban pynkhih ne bym lah ban pynjot.

Ia nujorSalm 15:5; Salm 16:8, Salm 21:7, Salm 62:2, Salm 112:6, bad Hebru 12:27.  Kiei kita kiei kiei ia ki bymlah ban pynkhih? 

Bun na ki nongpynkylla ktien kiba mynta ia ki Hebru 12:27 ki ong ba ka jingpynkhih ia ki bneng bad ka khyndew ka mut ba ia ki ym weng noh ba kin jah noh bymjukut.

Ka Baibl ka kren shai, ba U Blei un sa thaw ia ki bneng kiba thymmai bad ka khyndew kaba thymmai (Isaiah 65:17, Jingpynpaw 21:1-4), bad ia ngi yn sa pynmihpat bad ngin don ia ki met kiba thymmai (1 Thessoloni 4:13-17, Philipi 3:20) ha kata ka pyrthei.  Kumta ka jingpynkhih ka thew ia ka jingpynkhuid bad ka jingpynthymmai ia ki jingthaw,  ym ia ka jingweng lut phar.  Kaei kaba don mynta kan long kaban sha thaw biang sa shisien ha kaba kita kiba la siewspah kin shong.

Don kaei kaei kaba yn ym lah ban shah pynkhih.  Ka kynthup ia ki riewkhuid.  Ia ki yn ym lah ban pynkhih namar ba ki la shaniah ha U Blei.  U Nongthaw u la pynneh ia ki bad u la kular skhem ban pynim ia ki.

Peit ba ha ki Hebru, ka jingiaineh junom ka don ka jingiadei bad U Jisu.  Hebru 1:10-12ka kren shaphang U Jisu:

“ Bad Me ha kaba mynnyngkong, Me  Ah Trai me la pynshong nongrim ia ka khyndew bad ki bneng ki long ki kam ki kti jong me: Kita kin jot noh hynrei me me iaisah bad kita baroh kum ka jain kin rim noh; bad kum ka barandi men khylliap ia ki kum ka jainkup keiñ bad yn pynpli ia ki hynrei me me long ujuh bad ki snem jong me kin ym kut.” Ki Hebru ki ong ruh ba ka jinglong lyngdoh jong U Jisu ka iaineh junom (Hebru 7:3,24), kumjuh ruh ki jingiohpateng jong kiba la siewspah (Hebru 10:34). Ha ka jingbishar kaba khadduh, kito kiba iaibat skhem “ha U Jisu” kin neh skhem (Salm 46:5).

Hebru 12:28 ka ong ba ngin iohpdiang “ia ka hima kaban ym lah ban pynkhih”  Kane ka dei ka jingsot na U Daniel 7:18, kaba ong ba ki riewkhuid kin “ioh kynti ia kahima shi junom”  kane ka dei ka hima ka “ban ym lah shuh ban pynjot” ka kaba la kren ha U Daniel 2:44.  Kane ka hima ka dei ka jong U Khun, hynrei un sa ai kynti ia ka ha ngi.  Jingpynpaw 20:4 ka ong ba ngin synshar bad U ia ki bor bymman kiba la pynshitom ia ngi (peit ruh 1 Korin 6:3).

Haduh katno ngi tip, ia ka jingmut ban shah pynkhih?  Lada ngim pat tip bha, kaei ka jingjied kaba phi lah ban pynlong khang ban ioh jingiarap ha ki bynta kiba donkam?  Ephesos 4:14).

SNGI BASAN

March 17

To Ngin Long Kiba Sngewnguh

Ki Hebru ka pynkut ia kane ka bynta da kaba kdew ba ka jubab kaba iadei sha U Blei na ka bynta baroh kiei kiei kiba phylla kiba u la leh na ka bynta jong ngi ka long ba ngin sngewbnguh da kaba aiti sha u ia ka jingmane kaba dei biang.

Ia nujorHebru 12:28 bad Hebru 13:15,16. Kumno ngin ai sha U Blei ia ka jingmane bad jingshakri kaba pdiang hun ha khmat jong U?

Ha ka jingtrreikam jong ka jutang kaba rim, ka jingkñia ia ki mrad ka long ka lynti ha kaba kumno ki briew ki pyni ia ka jingkylla kabamut bad ka jingsngewnguh, hynrei kine ki jingkñia ki dei ban long ki dak jong ka jingsngewnguh ha ka dohnud jong u nongmane. Kumta,U Blei u la kren shai ha ki Salm bad lyngba ki nongiathuhlypa ba kaei kaba pynsngewbha ia U kam dei ka snam jong ki mrad hynrei ka jingsngewnguh, ki kam babha, bad ka hok ha ki nongmane (Salm50:7-23; Isaiah 1:11-17).
Namar kata U Paul u khot ia ngi ban mane ia U Blei ha ka jaka kyntang ha bneng da kaba ngi aiti ia ki jingkñia jong ki jingiaroh, ki jingphla ia ki pop, ki jingainguh bad ki kam babha, kaba long ka jingmane kaba shisha kaba pynsngewbha eh ia U. Ngi ai ia kine ki jingkñia ainguh ha ka pyrthei,hynrei ia ki la pdiang hun bad la sngewbha eh da U Blei ha bneng. Kane ka kynthup ia baroh ki jingkhot kiba u Paul u la pynlong lyngba ka shithi jong ka jingphla ia ka kyrteng jong U Jisu (Hebru 3:1, Hebru 4:14, Hebru 10:23) bad ia ka jingpynkhraw ia u yn nang iaibteng da ki kam babha jong ngi (Hebru 6:10-12; Hebru 13:1,2,16).
Ka jingkhotsngewbha jong u Paul ia ki nongsngap ban “aiti sha U Blei ia ki jingmane kiba pdiangsngewbha” (Hebru 12:28) ka mut ba ki riewngeit mynta shisha ki long ka jaitbynriew jinglong lyngdoh ia kaba la pynjanai bad pynkyntang lyngba ka jingiap jong U Jisu Khrist (Hebru 10:10- 14, 19-23). Kane ka pyndep lut ia ki jingthmu tynrai jong U Blei na ka bynta ka Israel, ba kan long ka jaitbynriew ba kynja lyngdoh ba lyngba jong ki un lah ban pynbna ia ka khubor babha jong ka jingpynim sha ka pyrthei (Eksodos 19:4-6; 1 Petros 2:9,10; Jingpynpaw 1:6; Jingpynpaw 5:10).
Hebru 13:1-6 ka batai kumba ka long kaei ka jingmut ban leh bha bad ban iasam ia kaei kaba ngi don. Ka mut ban pyni ia kajingieit kum shipara, kumba U Jisu u la pyni ia ka jingjingieit kum shipara ia ngi (Hebru 2:11,12). Ka mut ba ngin long kiba sbun ban leit jngoh ia kito kiba don ha ki byndi ia kiba la shah lehbeiñ (Hebru 13:3), bad ban kyntait ia ka jingklim bad ka jingikwah.

Balei ba ka long kaba donkam ban ñiew ba ki kam jingleh bha bad ban sam ia kiei kiba ngi don ba ki long shibynta na ki jingmane ia U Blei? Ha ka juh ka por, kiei ki lynti ba shisha ba ka jingkñia ba kynja mynsiem jong ngi sha U Blei ka lah ban shah pynsniew noh (Isaiah 1:11-17)?

SNGI PYNKHREH

March 18

Pule shuh shuh:Ha ka shihajar snem hapdeng ka jingmihpat kaba nyngkong bad kaba ar, ka jingbishar ia ki bymman kan long. U apostol Paul u kdew sha kane ka jingbishar kum ka jingjia kaban bud ia ka jingwan arsien jong U Jisu. “kumta phi wat bishar ei ei ruh ha bym pat poi ka їa tadynda U Trai un wan uban pynshai ia kiei kiei ba la buhrieh jong ka jingdum bad uban pynpaw ruh ia ki jingthmu jong ki dohnud.” 1 Korin 4:5. U Daniel u pynbna ba haba U Mynhyndai Kulong u la wan “ia ka jingbishar la ai ha ki riewkhuid jong U BaHakhlieh Tam Eh. Daniel 7:22. Ha kane ka por kiba hok kin synshar kum ki syiem bad ki lyngdoh ha U Blei. U Ioannis ha ka Jingpynpaw u ong “Bad nga la iohi ia ki khet bad don kiba la shong halor jong ki bad la ai ka jingbishar ha ki. Kin long ki lyngdoh jong U Blei bad jong U Khrist bad kin iasynshar lem bad u shi hajar snem.” Jingpynpaw 20:4,6. Dei ha kane ka por ba kumba la iathuhlypa da u Paul, “ki riewkhuid kin ia bishar ia ka pyrthei.” 1 Korin 6:2. Shitylli bad U Khrist kin ia bishar ia ki bymman da kaba ia nujor ia ki kam jong ki katkum ka Kitab ka hukum, ka Baibl, bad ban ai ia ki rai katkum ki jingleh jong ka met jong ki. Ia ka rai jingpynshitom ba ki bymman kin mad yn sa pynbna, katkum ki kam jong ki bad la buh jingkynmaw pyrshah ia ki kyrteng jong ki ha ka kitab ka jingiap.
“Ia u Soitan bad ki angel bymman la bishar da U Khrist bad ki briew jong U. U Paul u ong: “Hato phim tip ba ngin ia bishar ia ki angel?” Dkhot 3. Bad u nongbishar un pynbna ba “ki angel kiba khlem la sumar ia ka bynta ba nyngkong jong ki, hynrei kiba la iehnoh ia ki, U la buh ia ki ha u kynjri ba bymjukut hapoh ka jingdum sha ka jingbishar jong kata ka sngi bakhraw Judah 6.” Ellen G. White, The Great Controversy, pp. 660,661.

Ki Jingkylli ban ia Puson:
1. Kaei ba ka jingiashim bynta jong ki riewkhuie ha ka jingbishar ia ki bymman (1 Korin 6:3; Judah 6)ka kren shaphang U Blei, ba haduh katno u long uba beit bad uba hok ba un don bad ngi bad pyni ha ngi ia ka jingbha
bad ka jinglong hok jong U ban bishar ia ka pop bad ia u bymman?

2. Pule Eksodos 32:32, Salm 56:8; Salm 69:28, Salm 139:16; Isaiah 4:3; Daniel 12:1; Malakhi 3:16; Loukas10:20, Jingpynpaw 13:8, bad Jingpynpaw 17:8. Kine ki dei ki jingsot na ka Ktien U Blei ha bneng. Kiei kita kiei kiei ia kiba la thoh ha kine ki Kitab? Balei ba ka long kaba donkam ba U Blei un buh jingthoh shaphang ki ummat jong ngi (Salm 56:8), kum ka nuksa? Lada U Blei u tip lut ia kiei kiei baroh, kaei ka jingthmu jong ki kitab jingkynmaw kiba kum kita?

3. Balei, ba phi pyrkhat ba ka long kaba donkam ba ki Hebru ka pynkut ia ka jingiakren da kaba pyniadei bad ka jingkular kaba la shem ha U Daniel 7? Balei ba kine ki jingiadei ki long kiba donkam ha ka jingshakri jong U Jisu ha bneng? Kaei ba U Daniel 7 ka hikai ia ngi shaphang kabakut jong kiei kiei kiba kynja pyrthei baroh?