Lesson 10
February 26–March 4
Porda Gita Jisu Ramako Oaha
SABBATH ATTAM
IA ANTINI LESSONNA PORAIANI: Ibri. 9:24; Ibri. 12:18–21; Levi. 16:1, 2; Ibri. 10:19–22; Ibri. 12:22–24.
MINGANI POD: “Maina chong∙motgipani noksa jakchi dakgimin rongtalarangnio Kristo napjaha, indiba salgi chong∙moto, da∙on an∙chingni a∙sel Isolni mikkango mikkang pa∙na ine napaha.” (Ibri. 9:24).
JISUNI SNINGGIPARANG katchaan gapaha. Dikdiksasan ong∙engpitichim, uamang uamangni Gitel aro Ripeng Jisu baksa Joiton A∙brio ong∙engachim. Jisu a∙gilsakoni doangna skang, Uni bimungo Isolona re∙bachina Uni sninggiparangko okamaha. Unikode uamang Jisuni salgichina doangako nikgrikaha. Uamangna biapko daksona Jisu salgichina re∙angaha. (Johan 14:1–3). Jisuan uamangko paponiko jokatna daitoko ra∙gipa ong∙aha. Jisuan uamangna salgiona re∙na gita gital chol ramakoba dakaha. Jisu ia chol ramako An∙tangni an∙chichi dakaha.
Jisuni salgichina doangani bidingo skie ra∙anian Ibri ki∙tapni nangchongmotani ong∙a. Salgichi re∙angani ja∙mano, Jisu An∙tangni kamko, chongmotan, Kamal Dal∙gipani kamko a∙bachengaha. Uan an∙chingni toromni dilgipa aro Rajaba ong∙a. Dal∙bate, Gital Ku∙monggrikani a∙bachengaha. Da∙ode, an∙ching Isolona ka∙donge aro kimkimgipa bebera∙ani baksa re∙bana man∙a. Jisu aro Uni rongtale janggi tangani a∙sel, an∙ching iarangko dakna man∙aha.
ROBIBAR
February 27
JISU PAGIPANI MIKKANGO (Ibri. 9:24)
Jisuara maina ia a∙gilsakko wate salgichina re∙angaha? Ibri. 9:24 ko poraibo.
Ibri. 9:24 ko ma∙sina gita, hai an∙ching Israelna Isolni on∙gimin ale cha∙anirangko niatchengna: “Na∙simang Angna bilsio changgittam alaniko dake manibo. Wanti grigipa pitani alaniko na∙a manibo; na∙a Angni nang∙na ge∙etgimin gita Abib jani tik ka∙gimin salo, sal sni wanti grigipa pitako cha∙bo (maina una na∙a Egyptoni ong∙katbaaha); aro darangba Angni mikkangona jakari re∙bajachina; aro mi raani alaniko, a∙bao nang∙ni ge∙a gamani bite nangchengako; aro bilsini bon∙kamao chimongani alaniko, jensalo na∙a nang∙ni gamako a∙baoniko chimonga. Bilsio changgittam nang∙ni pilak me∙asarang Gitel Jihovani mikkango mikkang pa∙china.” (Reo. 23:14–17).
Wanti Grigipa Pitani Alani, ba Watchangani Alanian Israelko Egyptoniko Isolni jakgitelatani somoiko an∙chingna mesoka. Unikode Antirangni Alani aro Jamdapni Alani donga. (Deut. 16:16). Niam Gitalni somoio, Jihudirang Pentekosko Isolni Israelna Sinaio niamko on∙ani baksa nangrimate maniaha. Jamdapni Alaniara Isolni Israelna a∙gisio simsakani somoiko mesoka.
Alanirangko kan∙dike niatani ja∙mano, hai da∙ode Ibri. 9:24 ko niatna. Ia pod an∙chingna iako mesoka je, Jisu siaoni chakatpilani ja∙mano Pagipaona re∙angaha. Jisu jakari re∙angjaha. Ua Pagipaona An∙tangni on∙chakgimin an∙chi baksa re∙anga jean kamalni on∙ana bate nambatahachim. (Ibri. 9:23, 24).
Sastroni somoio maina me∙asarang ale manianirangona songreangaha? Uamang Isolni mikkangko nina re∙angaha. (Git. 17:15). Isolni mikkangko nina ine agananio saoba Isoloniko dakchakaniko bi∙enga ine an∙chingna talataniko daka. (2 Serikani 7:14; Git. 27:8; Git. 105:4). Iakon Jisuara salgichi re∙ange dakenga. Ua an∙chingna Isoloniko dakchakaniko bi∙enga.
SOMBAR
February 28
ISOLNI OKAMANI (Ibri. 12:18–21)
Sinai Abrio Israelrang maidakgipa chagrongani obostako man∙aha? Ibri. 12:18–21.
Isol Israelko Egyptoniko jakgitelatani ja∙mano An∙tangni manderangna dingtangmanchagipa miksongani donga. Ia miksonganiara maia? Isolara An∙tangni manderang baksa dingtangmanchagipa nangrimaniko nangnikaha. Isol Israelna indine agana, “Aro Mose Isolona doangaha; aro Jihova a∙brioni uko okame inaha, na∙a Jakobni nokna indake inbo, aro Israelni dedrangna aganbo, Egyptrangna Angni dakaniko na∙simang nikaha, aro maikai Anga do∙gamdotrangni grangrango na∙simangko bilbite na∙simangko An∙tangona rimbaaha.” (Reo. 19:3, 4).
Indake, An∙tangko grongna gita manderangko tarisochina Isol Mosena aganaha. (Reo. 19:10–15). Manderang tarisojaode sigenchim. Uni gimin manderang salgnina kingking an∙tangtangko tarisoaha. Uamang an∙tangtangni ba∙ra cholarangko su∙srangaha. Uamang damsan bi∙rimaha. Ka∙tongrangoniko papko rongtalatchina uamang Isolo bi∙aha. Gittamgipa salo, “darangba jakchi uko dangdikjachina, indiba ua ro∙ong gotatako man∙chongmotchina, ba brachi goako man∙china; ua jillani ong∙oba, ba mande ong∙oba, ua tangjachina; bakroe singga sikoa, uamang a∙briona re∙bachina.” (Reo. 19:13). Isolko grongna a∙brichi re∙anganio Moseni chagronggimin apsan obostako chagrongchina Isol manderangko nangnikenga. Ua somoio, “Mose, aro Aaron, Nadab aro Abihu aro Israelni me∙aparangoni saksotsni doangaha; aro uamang Israelni Isolko nikaha; aro Uni ja∙arangni kokkimao sapphire ro∙ongko ana gita, aro grikani giminde Ua salgisrang gita ong∙achim. Aro Israelni dedrangni pamongrangni kosako Ua jak on∙jaha; aro uamang Isolko nikaha, aro cha∙a ringaha.” (Reo. 24:9–11)
An∙chingni rongtalgipa Isolni sambaona re∙bana gita an∙chingara maina kenna nangja? Uona sepangbae re∙bana skang an∙chingara maiko dakchengna nanggen?
MONGOLBAR
March 1
PORDAKO NANGANI (Levi. 16:1, 2)
Israelrang a∙gisio Ku∙monggrikani Tambuko rikaha. Uamang uano Isolko grongaha aro Uko olakkiaha. Tambuo adita pordarang dongachim. Skanggipao, tambuko pordachi duulachim. (Reo. 38:18). Ian tambuni guare gita ong∙aha. Gnigipao, tambu aro sa∙rako pordachi bak dakaha. (Reo. 36:37). Gittamgipao, Rongtalgipa Kuturi aro Rongtalbatsranggipa Kuturini gisepo pordachi bak dakaha. (Reo. 26:31–35).
Levi. 16:1, 2 aro Levi. 10:1–3 rangko poraibo. Ia podrango maia mikrakaniko an∙ching poraimana?
Israelrang an∙tangtangni a∙tipko konggranggipa ki∙tikbrini bimang gita dakaha. Ku∙monggrikani Tambuko ia konggranggipa ki∙tikbrini bijangchio rikaha. Unikode, Levirang ia Tambuni wilwilao a∙tipko dakaha aro Tambuko aro uni pilak bosturangko gipinrangoni chel∙chakaha. (Chanani 1:51). Levirangara Israelni manderangko naljoke rakkina mandeni tarigimin porda gita ong∙aha. (Chanani 1:53).
An∙chingni Kamal Dal∙gipa, Jisuan an∙chingni porda ong∙a. Jisuni a∙sel, rongtalgipa aro chu∙soksranggipa Isol manderangni gisepo dongna gita man∙aha.
Baditan Isolara an∙ching baksa chapchap ong∙e dongna man∙achim, iani bidingo kosako janapgipa obosta an∙chingna maiko skia?
BUDBAR
March 2
GITALGIPA ARO TANGGIPA RAMA (Ibri. 10:19–22)
Ibri. 10:19–22 ona poraibo. Ia podrango Paul an∙chingna maiko agana? An∙chingna maidakgipa okamani donga?
Salgini torom nokdringo Jisu An∙tangko ja∙rikchina Ua an∙chingko okamenga ine Paul agana. Jisuan “bebera∙ani nokgipa” (Ibri. 12:2) ong∙a. Rongtalbatsranggipa Kuturio pordani nalsao an∙chingna gital ramako oe on∙na Jisu an∙chingna skang re∙angsoaha. (Ibri. 6:19, 20; Ibri. 2:10). Ia gital ramako Gital Ku∙monggrikani ine mingaha. Ia Gital Ku∙monggrikanio Isol an∙chingni paprangko kema ka∙aha. Isol Uni niamkoba an∙chingni ka∙tongrango seaha. Da∙ode, an∙ching Isolona ka∙dongan gape bebera∙ao re∙bana man∙gnok. Isol an∙chingko kema ka∙na man∙na gita Ku∙monggrikanio nangnika pilakkon Jisu dakaha.
Jensalo Jisu an∙chingni Kamal Dal∙gipa ong∙ahaon, Isolni mikkango an∙chingko matnangna Satanni salgichina re∙baaniko dontongataha. Zekaria 3 o an∙chingna iako mesoka je, Satan Isolona re∙ange kamal dal∙gipa Joshuako matnangaha. Indiba Jisu an∙chingni paprangna sichakahani gimin, Isol Satanko salgioniko rikgalataha. (Par. 12:7–12; Johan 12:31; Johan 16:11). Da∙ode, Jisu an∙chingna dakgrikchake an∙chingko jokataha!
Nang∙ko matnangna Isol Satanna chol on∙genchimode, nang∙ni gimin maiko Satanara matnangna man∙gen? Nang∙ni ka∙donganiara maia dongkugen?
BRISTIBAR
March 3
UAMANG UNI MIKKANGKO NIKGEN (Ibri. 12:22–24)
Ibri. 12:22–24 ona poraibo. Ia podrango Paul indine agana, “Indiba na∙simang Zionni a∙briona aro tanggipa Isolni songjinma salgini Jerusalemona aro tasi tasi tom∙tokgimin sa∙grerangona aro salgio segimin dejakrarangni mondoliona bichal ka∙gipa pilakni Isolona aro chu∙sokatgimin toromirangni gisikrangona aro niam gitalni baltigipa Jisuona aro Abelnina bate nambatako agangipa kikiani an∙chiona re∙baaha.” (Ibri. 12:22–24). Iano Paulara maiko miksonge aganenga?
Jisuko ja∙rikgiparang Zionona re∙baaha ine Paul agana. Zionara Jerusalemni minggipin bimung ong∙a. Bebera∙achi, ja∙rikgiparang salgini Jerusalemona re∙baa. An∙ching salgini songjinmako da∙ode nikkuja indiba bebera∙achi uko man∙na ka∙dongsoenga. (Ibri. 11:1).
An∙chingba Jisuni a∙sel Zionona re∙bana man∙a. Salgio Jisu baksa asongna Ua an∙chingna biapko on∙enga. (Eph. 2:5, 6; Kolossi. 3:1).
Jisuan an∙chingni Kamal Dal∙gipa ong∙a. “Jeko an∙ching janggini siltin gita man∙a, ua mangraka aro kimkim aro ba∙ra dongpengani ning∙chi donggipaona napanga.” (Ibri. 6:19). An∙ching ia ku∙rachakanio ka∙dongchakna man∙chongmota. (Ibri. 7:22).
Ibrini ki∙tap aro Parape∙a an∙chingna iako mesoka je, Jisuan bon∙kamgipa alaniko rakkigen: chong∙motan, Jamdapni Alaniko rakkigen. An∙ching ia alaniko Jisu baksa “pangchakani gnanggipa” songjinmao manigen “jeni dakgipa aro rikgipa Isolan” ong∙a. (Ibri. 11:10, 13–16). Ia songjinmara salgio donggipa Gital Jerusalem ong∙a. An∙ching uano Un baksa jringjrotnan dongkamgen. (Par. 7:15–17; Par. 21:1–4; Par. 22:1–5; Chanani 6:24–26).
SUKROBAR
March 4
CHANCHIDAPANI: “Jisu salgichi re∙angaha. Uni sninggiparang iako u∙ia je, Uni re∙anganian Isol An∙tangni ku∙rachakaniko rakkiani chin ong∙a. Isol uamangna Gisik Rongtalgipako watatgen. Jisuni sninggiparang ia pattaianiko man∙na uamang Isolni kamko ka∙na skang sengna nanggenchim. Jensalo Jisu salgini cholgugarangko napahaon, Isol Jisuko Uni singhasono asongchina aganaha. Sa∙grerang singhasonni wilwilao chadenga aro Jisuna mandera∙aniko aro de∙mitelaniko daka. Unikode, Isol An∙tangni Gisik Rongtalgipako Jisuni sninggiparango rudapa. Isol uamangna Uni Gisikko suake on∙aha. Ia suakgipa on∙anirangchi Jisuna rasongko on∙a. . . .
“Uni gimin, Jisuni sniggiparang Jisuni gimin kimkimgipa ka∙tongrangchi agan-talatna man∙aha. Jisuan uamangni Ripeng ong∙aha. Uan uamangni Adatangba ong∙aha. Jisu An∙tangni sninggiparangko An∙tangona melibegipa ripeng ong∙aniona salbaaha. Da∙ode, bebera∙achi, Uni sninggiparang Un baksa salgio asongengaha.”—Ellen G. White, The Acts of the Apostles, jak 38, 46.
CHANCHIGRIKNA SING∙ANIRANG:
- Gitko segipa indine agana, “Angni janggi Isolna gitok ran∙a, tanggipa Isolna; anga basako re∙bae Isolni mikkango mikkang pa∙gen?” (Git. 42:2). An∙chingba maikai apsandake gitok ran∙na ba Isolni sambaona re∙bana skani donggen? Isolko u∙ianichi aro Uko gronganichi an∙chingko katchaatgipa kamranga maiarang ong∙a?
- Israelrang Moseko Isol baksa gronggrikchina aganaha jedakode uamang grongena gita nangjawa. Ia obosta an∙chingna nangchongmotgipa Sastroni nama kattako mesoka. An∙chingara an∙tangtangsa Isolona re∙bana nanga. An∙ching bang∙a changon, gipinrangko an∙chingna Sastroko poraichina on∙a. Mitam manderang indake chanchia je, uamangni bi∙anirangna bate gipinrangni bi∙anian nambata. Uni gimin uamang sakgipinko uamangna bi∙chakchina agana. Indake dakako an∙chingara maina gelna nanga? Maikai an∙chingara Jisuni a∙sel darangkoba nanggijan an∙ching an∙tangtangan Isolona re∙bana man∙a?
- Ibri ki∙tapara Isolni ka∙sachakanio ka∙dongani bidingo talatgipa ong∙a. Jisu an∙chingna kam ka∙ahani gimin an∙chingko Isol jokatchongmotgen ine an∙ching ka∙dongchakna man∙a. Tol∙gipa bebera∙aniko man∙jana gita an∙chingara maina simsakna nanga? Jensalo mande Isolni kattako manina jechakaha, ua mandeo tol∙gipa bebera∙ani donga.